García-Page négase a negociar unha reforma do sistema de financiamento autonómico cun trato singular para Cataluña

"A riqueza de Cataluña non é dos cataláns, é de todos". É a máxima da que parte o presidente de Castela-A Mancha para negociar unha reforma do sistema de financiamento autonómico. Así llo trasmitiu a Pedro Sánchez na Moncloa.

"Non imos aceptar como base de negociación o documento asinado entre o PSC e ERC. Será un documento para a gobernabilidade de Cataluña, pero baixo ningún concepto vai ser o documento a partir do cal nos poñamos a discutir", dixo García-Page, que lle pediu a Sánchez unha negociación multilateral, con todas as comunidades sentadas na mesma mesa e sen singularidades. O Goberno inclúe matices.

Ángel Víctor Torres, ministro de Política Territorial, di: "Farase unha negociación multilateral no Consello de Política Fiscal e Financeira e tamén haberá negociacións bilaterais, que están recollidas nos Estatutos de Autonomía".

As posturas dos presidentes da Comunidade Valenciana e de Murcia non distan moito da do barón socialista.

A maiores, ambos esixiron un fondo transitorio que compense o seu infrafinanciamento mentras non se chegue a un acordo sobre a reforma do sistema.

Carlos Mazón, presidente da Comunidade Valenciana,  di: "Falar da igualdade dos españois só para que uns teñan privilexios pero sen facerlles caso aos que estamos ao final da cola é romper a igualdade. Mentras non se reúne o Consello de Política Fiscal e Financeira e se reforme o sistema pedimos un fondo de compensación".

Fernanco López Miras, presidente de Murcia, sostén: "Transmitinlle a miña preocupación, o meu rexeitamento a que se nos trate de forma desigual e a que se rompa o principio de solidariedade. O que me transmitiu é que non rompía o principio de solidariedade, e a verdade é que o vexo imposible".

Desde o Goberno comprométense a negociar unha reforma que sexa boa para o conxunto das comunidades e que todas recibirán máis.