Cinco investigados por difundir fotos de mozas menores espidas con IA

A Garda Civil investiga en Sevilla cinco mozos, algúns deles menores de idade, por crear e difundir imaxes de 20 mozas menores de idade modificadas con Intelixencia Artificial (IA) para mostralas espidas en fotografías.

Nun comunicado, a Garda Civil informou de que a investigación comezou tras a denuncia que interpuxeron os pais dunha das vítimas pola difusión de imaxes manipuladas da súa filla, mostrando fotografías que foran alteradas mediante un software de intelixencia artificial e distribuídas a través dunha aplicación de mensaxería instantánea.

Os axentes identificaron todas as persoas implicadas, tanto maiores como menores de idade, que inicialmente difundiron fotos de 20 mozas menores de idade ás que coñecían e conseguían que aparecesen sen roupa.

Unha vez manipuladas as imaxes, eran difundidas por grupos de redes sociais coñecidas, causando un dano significativo tanto emocional como social ás vítimas, mentres que o realismo das imaxes xeraba unha gran dificultade para distinguir entre aquelas que eran auténticas e as que foran modificadas.

Por todo iso, investíganos polos delitos de pornografía infantil e revelación de segredos, e as dilixencias instruídas xunto cos datos identificativos dos cinco investigados foron postos á disposición da autoridade xudicial.