Comerciantes de Pontevedra recollen sinaturas para que se acendan antes as luces de Nadal

O Concello de Pontevedra non acenderá a súa iluminación do Nadal ata o próximo 16 de decembro, dez días máis tarde do que era habitual, por "responsabilidade" ante a crise enerxética e para rebaixar o custo da factura eléctrica.

Pero un grupo de comerciantes da cidade está facendo unha recollida de sinaturas para pedir que se adiante o acendido da iluminación.

Queren evitar así que os clientes vaian facer as súas compras a outras cidades máis decoradas. 

Este xoves presentarán o documento no Concello. 

O Goberno municipal defende que manter a iluminación acesa case un mes elevaría o gasto nesta iluminación, que ascende a uns 140.000 euros, en máis dun 40 %.

Desta maneira, as luces de Nadal alumarán as rúas e prazas de Pontevedra entre o 16 de decembro e o 8 de xaneiro, entre as seis da tarde e as dúas da madrugada, excepto en Noiteboa e Fin de Ano que estarán activas ata as catro.

"Podo entender que haxa xente que discrepe desta decisión pero entendemos que é o máis adecuado", explicou a edil de Festas, Carme da Silva, que subliñou que esta medida foi froito dun proceso de reflexión ante a situación que atravesa o país.

Da Silva asegura que o Concello é "consciente" de que adoptar unha decisión deste calado "é ir a pé cambiado" co que están a facer moitos outros municipios, pero reitera que por "racionalidade" esta iluminación debe cinguirse á época propiamente do Nadal.

A edil asegurou que as administracións públicas deben mandar mensaxes "serias e non contraditorias" á sociedade, cando aos cidadáns se lles pide que aforren enerxía, ou se lles di que hai unha crise enerxética enorme ou que pode haber risco na subministración de calefacción.

Desde o PP, o seu portavoz Rafa Domínguez asegura que esta medida representa o "deixamento e falta de previsión" do Concello pontevedrés, ao que acusa de danar "deliberadamente" ao comercio da cidade ao derivar visitantes a outras localidades próximas.

O Goberno municipal sostén que o comercio local "non se vai ver afectado" por esta medida, da mesma maneira que noutras datas festivas como o entroido ou as festas patronais o aceso limítase aos días nos que se celebran as festividades.