Comeza en Vigo a rodaxe de 'Romería', a terceira longametraxe de Carla Simón
Comeza en Vigo a rodaxe de 'Romería', a terceira longametraxe de Carla Simón
A directora catalá, Oso de Ouro en Berlín por Alcarràs, indaga no seu terceiro filme nas súas orixes galegas
A realizadora Carla Simón, na rodaxe de 'Romería' en Vigo (Mario Llorca / Elastica Films).
Romería, a terceira longametraxe de Carla Simón tras Estiu 1993 e Alcarràs, comezou a súa andadura en Vigo, cidade en que se rodará durante os meses de agosto e setembro.
Nesta película, producida por María Zamora, Premio Nacional de Cinematografía 2024, a cineasta catalá, gañadora con Alcarràs do Oso de Ouro en Berlín, segue explorando as relacións familiares, inspirándose esta vez nas orixes da súa familia biolóxica paterna.
¡Llegó el día! 🎬💙 Comienza el rodaje de ROMERÍA, el tercer largometraje de Carla Simón.
— elasticafilms (@ElasticaFilms) August 2, 2024
El equipo lleva meses instalado en Vigo para preparar la producción de esta película, en la que la directora de #Alcarràs y #Estiu1993 sigue explorando las relaciones familiares,… pic.twitter.com/xYOpHwwA5a
A protagonista de Romería é Mariña, unha muller que viaxa a Vigo para coñecer a familia do seu pai biolóxico, que morreu de sida, do mesmo xeito que a súa nai, cando ela era moi pequena.
A través dos encontros cos seus tíos, tías e avós, tenta reconstruír un relato coherente do seu pai e da historia de amor que viviu coa súa nai, pero non o consegue, xa que todos senten demasiada vergoña cara aos conflitos de drogas da parella, algo que Mariña lles lembra coa súa presenza. Será a historia de amor adolescente que vive co seu curmán a que lle permite reimaxinar os seus pais e conectar con eles, inventando un conto grazas ao diario da súa nai que a libera do estigma que a súa familia sente por eles e cumprindo o desexo de entender o pasado.
"Teño a sorte de formar parte dunha gran familia chea de historias que se converteron na miña fonte de inspiración", explica a directora.
Subliña que as relacións familiares "me fascinan porque non as escollemos" e son sempre "orixe de moitos conflitos, traumas e pelexas", pero tamén "é a orixe do amor, a confianza e a lealdade máis profunda".
O elenco, encabezado pola debutante Llúcia Garcia, conta con Mitch Robles, Tristán Ulloa, Celine Tyll, Miryam Gallego, Janet Novás, José Ángel Egido e Sara Casasnovas, entre outros.
A historia sucede en dous tempos, un deles, a transición española, unha época en que se deixaba atrás unha longa ditadura, unha etapa de máxima apertura e experimentación en que algúns mozos romperon cos valores da xeración anterior.
A transición ten moitas historias e, en palabras da autora, "algunhas explícanse moi pouco" como o feito de que a liberdade derivou nun gran consumo de drogas e en 1983 empezouse a falar da crise da heroína en España.
En 1987 iniciouse un novo período e, mentres diminuían os novos consumidores, a mortalidade causada por esta droga crecía, principalmente por mor da infección do VIH.
A principios dos anos noventa, arredor de 21.000 persoas morreron de sida en España, o país coa incidencia máis alta de toda Europa, lembra a directora catalá.
É por iso que, segundo Carla Simón, "Romería non é só a historia da miña familia, senón a de toda unha xeración que desapareceu tocada pola sida e a de todos aqueles orfos que deixaron vivos e desposuídos de orixes, pasado e recordos".
Romería, en que Simón volverá estar rodeada polo seu equipo habitual, é unha produción de Elastica en coprodución con Ventall Cinema (Alemaña), Dos Soles Media e Romería Vigo. Conta co financiamento do Goberno de España, l’Institut Català de les Empreses Culturals, Xunta de Galicia, Eurimages, Europa Creativa MEDIA, FFA, Comunidade de Madrid, Radio Televisión Española, Vodafone, Movistar Plus+, Netflix, 3Cat, ZDF/ARTE e The Post Republic.
