Seis mossos aceptan un ano de cárcere por agresión racista en Barcelona
Seis mossos aceptan un ano de cárcere por agresión racista en Barcelona
Non entrarán en prisión e non poderán traballar como policías durante seis meses
A Fiscalía pedía para eles tres anos e medio de prisión por un delito contra a integridade moral e lesións
![A Fiscalía pide tres anos e medio de prisión pola agresión acontecida en 2019](https://img-g24-crtvg.flumotion.com/prog24/2023/20230918/colXUIZOMOSSOS_frame_400.png)
Seis mossos d'esquadra, cinco axentes e un cabo, aceptaron este luns unha condena dun ano de prisión, que non cumprirán, e seis meses de inhabilitación como policías tras recoñecer unha agresión con motivos racistas en Sant Feliu Sasserra (Barcelona) en xaneiro de 2019.
O xuízo tiña que empezar este luns na Audiencia de Barcelona, pero chegaron a un acordo entre as defensas, a acusación particular que exerce SOS Racisme e a Fiscalía.
Ao tratarse dunha condena inferior a dous anos de cárcere, e como os policías non teñen antecedentes, non cumprirán a pena de prisión a condición de que non reincidan nos próximos tres anos e de que sigan un programa de igualdade de trato e non discriminación.
A condena é polos delitos de atentado contra a integridade moral e por lesións leves, e tamén inclúe unha multa de 300 euros, o pago dunha indemnización de 80.000 euros ao denunciante, Wubi, por danos morais e lesións, e unha orde de afastamento de 500 metros durante catro anos.
Ao pechar o acordo, tívose en conta como atenuante para os seis policías que entre todos xa consignaron 30.000 euros como adianto para a indemnización da vítima.
Cinco dos seis policías foron condenados co agravante de delinquir por motivos racistas, mentres que o sexto está condenado pola súa actitude omisiva, é dicir, por presenciar a agresión e non facer nada para impedila.
A sentenza é firme
Acusacións e defensas xa anunciaron que non recorrerán a sentenza que o tribunal ditou 'in voce' este mesmo luns, de maneira que o tribunal declarou que a sentenza e a suspensión da pena de prisión xa son firmes, e a inhabilitación como policías computa desde este luns.
A resolución xerou a indignación de dous activistas que estaban entre o público na sala, e que berraron expresións contra a xustiza como 'mercenarios' e 'vergoña'.
Antes deste acordo, a Fiscalía pedía para cada acusado unha condena de tres anos e medio de cárcere e catro anos de inhabilitación para exercer como policía, mentres que SOS Racisme reclamaba seis anos de prisión e que non estivesen inhabilitados e non puidesen ser policías durante 12 anos.
Golpes, insultos e un tiro ao aire
Con este acordo, os seis mossos recoñeceron os feitos que lles atribuía o fiscal no seu escrito de acusación: acudiron a un piso que estaba ocupado, alí atoparon ao denunciante e "movidos por un profundo desprezo e animadversión cara á súa cor de pel, empuxárono e cuspironlle, a continuación batéronlle na cabeza e déronlle patadas nas costas, mentres lle guindaban bolsas de lixo e espetábanlle insultos de índole racista".
Un dos axentes fixo un disparo ao aire para asustalo e despois díxolle: "Fallei, se non, rebéntote. Dispareiche, eh!"; logo detivérono por un presunto delito contra a saúde pública e, estando esposado, seguiron baténdolle e insultandoo.
Entre outras expresións, chamáronlle 'Kunta', en alusión ao personaxe ficticio 'Kunta Kinte', un escravo de pel negra, e tamén: "Hai dúas maneiras, ou esposado ou inconsciente e lévante na ambulancia, é a única, eu só coñezo eses tipos de inmobilización. Agora, que se ti me dis a segunda maneira, eu estou encantado, eh".