Comezan en Sarria as festas patronais de San Xoán

O campo da feira de Sarria acollerá o inicio das festas patronais da vila. Tras varios anos de celebración a medio gas, haberá unha touciñada popular, seguida dunha queimada e dun concerto que amenizará o acendido da fogueira. Ademais, poderase ver un correfoc con demos que botan chispas.

Fermín Alegre, presidente da asociación cultural Dimonis de La Plana: "Un correfoc é un espectáculo pirotécnico tradicional na nosa zona, en Castellón. Trouxémolo a Sarria para deleite dos veciños. Unha vez prendida fogueira, faremos un percorrido con demos".

Tamén desfilarán as pampónigas, como son coñecidos en Sarria os xigantes e cabezudos. Farano durante varios días, en que tamén haberá actuacións na praza da vila.

Verónica Quintela, presidenta da asociación cultural CreArte: "Saen hoxe co pregón e van andar pola Rúa Maior. O que fan as pampónigas é interactuar coa xente. O bonito delas é ver as reaccións de nenos e maiores, que se acordan de cando saían anos atrás".

Pepe Quiñoa, presidente da sociedade cultural A Unión de Sarria: "A Unión é un referente dentro das festas de Sarria. É tradición que o 24 se faga unha sesión vermú aberta ao público. É onde se xunta a maior cantidade de xente".

Serán en total cinco días de festa, cunha ampla e variada oferta de actividades e de animación polas rúas de Sarria.