Condena rotunda da cidadanía aos seis asasinatos en tres casos de violencia machista

As mostras de condena aos tres crimes machistas que deixaron este sábado catro mulleres asasinadas e dous menores repetíronse en Cuenca, Málaga e Granada. En todas as concentracións recordaron que as vítimas foron asasinadas pola súa condición de ser mulleres, igual que o crime dos dous menores a mans do seu propio pai. 

A violencia machista non entende de idades, culturas ou lugares. Foi unha das proclamas da concentración celebrada nas Pedroñeras, en Cuenca, e que se constatou este sábado, o día con máis vítimas da violencia machista do ano: catro mulleres e dous menores. 

O asasinato de Ammal e dos seus fillos de 3 e 9 anos a mans da súa exparella sacou á rúa a toda a veciñanza e a unha comunidade de apoio que foi quen denunciou a súa desaparición. Coñecían a súa exparella e pais dos seus fillos, sabían que el tiña unha orde de afastamento despois de varias denuncias por agresións e que Ammal estaba no sistema de Seguimento Integral por Violencia de Xénero, pero non foi suficiente para salvarlle a vida a ela e aos seus cativos.

Tolerancia cero contra o machismo, tamén en Zafarraya, Granada. Laura de 20 anos e a súa nai Marian, de 49 foron tiroteadas polo exmozo da máis nova despois de que ela lle puxese fin á relación.

"Estamos desfeitos pola traxedia que supón o asasinato de Laura e de Marian, mulleres queridísimas por todas nós, mulleres valentes e independentes que foron brutalmente asasinadas simplemente pola súa condición de ser muller", recordou Rosana Molina, alcaldesa de Zafarraya.

E mostras de repulsa tamén en Fuengirola. Con 76 anos foi asasinada Petra, a mans do seu home, de 75. Apareceu estrangulada, e el deixou unha carta en que confesaba a autoría. Despois de matala intentou suicidarse, pero está fóra de perigo.