Condenados dous menores en Vigo por difundir un vídeo sexual dun compañeiro de instituto
Condenados dous menores en Vigo por difundir un vídeo sexual dun compañeiro de instituto
Os rapaces, de 16 anos, terán que participar en talleres de educación sexual e realizar tarefas socioeducativas
A vítima, que sufriu danos morais, será indemnizada con 1.000 euros
A Sección Quinta da Audiencia Provincial en Vigo ratificou a pena imposta a dous menores de 16 anos condenados por senllos delitos de descubrimento e revelación de segredos. Impóñenlles medidas reformadoras de liberdade vixiada.
Durante 6 meses terán que participar nun taller de educación sexual e de habilidades sociais para mellorar a empatía e o respecto aos demais. Tamén realizarán tarefas socioeducativas para previr os riscos do sexting e sobre o uso responsable das novas tecnoloxías.
Os feitos tiveran lugar en abril de 2021. Nese momento abríuselle un expediente a un dos rapaces por ter no seu teléfono un vídeo sexual dun compañeiro. O mozo exhibiuno no centro educativo e mesmo o difundiu por WhatsApp.
O outro menor condenado tamén colaborou na difusión. O afectado sufriu danos morais polas burlas dos compañeiros, polo que tamén terán que indemnizalo con 1.000 euros.
