Condenan a catro anos de prisión á nobel da paz Suu Kyi

A exlíder birmana deposta e nobel da paz, Aung San Suu Kyi, foi condenada este luns a catro anos de prisión na primeira sentenza polos diversos xuízos aos que se enfronta baixo a xunta militar que tomou o poder nun golpe de estado do pasado 1 de febreiro en Birmania.

Fuentes próximas ao xuízo, que non poden identificarse por medo a represalias por parte da xunta, precisaron que Suu Kyi, de 76 anos, foi sentenciada a dous anos de cárcere polo delito de incitación contra os militares e outros dous anos por vulnerar a normas da covid-19.

A exmandataria foi sentenciada nunha vista na capital por un tribunal que impuxo a mesma condena por cargos idénticos ao presidente deposto, Win Myint, e unha pena de dous anos de cárcere para o exgobernador de Naipyidó, Myo Aung.

O tribunal non precisou a que prisión serán enviados os detidos, que durante o proceso estiveron illados polos militares e tiveron acceso limitado aos seus avogados.

A sentenza tamén implica a inhabilitación política dos detidos no hipotético caso de que a xunta celebre eleccións, algo que prometeu sen fixar unha data aínda. 

O Consello de Seguridade da ONU, numerosos Gobernos como os dos Estados Unidos, Reino Unido e Xapón e a Unión Europea solicitaron a liberación de Suu Kyi e outros detidos pola xunta militar liderada polo xeneral Min Aung Hlaing.