A Xunta ve “decepcionante” que o Goberno non conxele as peaxes
A Xunta ve “decepcionante” que o Goberno non conxele as peaxes
O Goberno estuda fórmulas para evitar que as peaxes da AP-9 e AP-53 suban un 8,4 %
Alfonso Rueda pídelle o Ministerio de Transportes que “faga o mesmo que fai a Xunta” e conxele as peaxes “con cargo aos seus orzamentos”
A Xunta aprobou conxelar as peaxes das autoestradas autonómicas
O presidente da Xunta, Alfonso Rueda, tachou de “francamente decepcionante” a posibilidade de que o Goberno central aprobe unha medida para reducir a previsible subida das peaxes nas autoestradas de titularidade estatal en Galicia, AP-9 e AP-53, xa que o que se busca é a “conxelación” total das peaxes.
Tras a reunión semanal do seu Goberno, Rueda manifestouse así sobre a posibilidade de que o Ministerio de Transportes utilice fondos propios para evitar que as concesionarias de autoestradas apliquen unha subida das peaxes do 8,4 % a partir do próximo 1 de xaneiro como consecuencia da forte alza que rexistra o IPC.
Con todo, o mandatario autonómico considera que o pertinente é que o Goberno consiga que non se produza “ningunha suba este ano 2023”.“Celebramos que se vaia concretando que haxa algún tipo de medida para evitar ese tipo de subida tan grande” pero é “francamente decepcionante” que non se consiga a conxelación total que é o que, a xuízo de Rueda, “agradecería a xente”.
Con este fin, o presidente da Xunta dirixiuse á ministra de Transportes, Raquel Sánchez, para tentar que o seu departamento “faga o mesmo que fai a Xunta” e conxele as peaxes “con cargo aos seus orzamentos”.
Neste sentido, o Goberno galego deu luz verde á medida da Consellería de Infraestruturas para conxelar as peaxes das autoestradas autonómicas, A Coruña- Carballo (AG-55) e Vigo-Baiona (AG-57), o que supoñerá beneficiar os 26.500 usuarios cada día.
Estas autoestradas, dixo Rueda, “son as máis baratas de toda España, queremos que o sigan sendo e iso pasa por conxelar as peaxes”, resolveu o presidente da Xunta.
