Confirman 15 anos de cárcere por matar a súa parella e entregar a cabeza a unha amiga

O Tribunal Supremo confirmou a condena a 15 anos de prisión a unha muller por matar a súa parella en Castro Urdiales (Cantabria) en 2019 e facer desaparecer o corpo, salvo a cabeza que entregou envolta en papel de agasallo dentro dunha caixa a unha veciña amiga súa.

Nunha sentenza o alto tribunal desestima o recurso da condenada contra a resolución do Tribunal Superior de Xustiza de Cantabria que confirmou a ditada pola Audiencia Provincial de Santander que lle impuxo dita pena por un delito de homicidio coa circunstancia agravante de parentesco.

No seu recurso a muller alegaba a vulneración do dereito fundamental á presunción de inocencia porque as probas practicadas non determinaran cal foi a acción de matar, cales foron os actos de execución e o nexo causal entre a acción de matar e o resultado.

O Supremo rexeita as súas alegacións e argumenta que no xuízo celebrado con xurado desenvolveuse unha profunda actividade probatoria que demostra que a condenada participou activamente e de forma intencional na morte da súa parella.

Respecto ás dificultades para sinalar as circunstancias exactas do falecemento o tribunal destaca que "o único vestixio que queda da morte é a cabeza da vítima, achada nunha caixa envolta con papel de agasallo e que a acusada entregou a unha veciña e amiga súa co rogo de que non a abrise, circunstancia na que permaneceu desde o mes de febreiro ata o mes de setembro de 2019".

Para o tribunal quedou corroborado o carácter violento da morte non natural nin accidental, decapitando o cadáver con instrumentos hábiles para iso, unido ao dato da desaparición do corpo.

A sentenza do maxistrado Andrés Martínez Arrieta explica que a acusada "en ningún momento proporcionou explicación razoable dos feitos e circunstancias que puidesen explicar o achado da cabeza no seu ámbito de dominio e menos unha explicación das circunstancias da tenza pola súa amiga".

O tribunal inclúe outros indicios como a aparición de impresións dixitais na bolsa que envolvía a caixa co cranio da vítima e a adquisición de ferramentas como unha motoserra, martelos e serras por parte da acusada.

Así mesmo, o seu acceso a Internet para informarse sobre o funcionamento da motoserra ou sobre aspectos legais como dereito a indemnizacións en caso de desaparicións, cobranzas de pensión e reparticións de herdanza.

A sentenza indica que neste caso "o conxunto de actuacións realizadas pola acusada permite acreditar a súa participación, como se declara probado, na morte violenta do falecido, aínda que non sexa posible afirmar o modo concreto co que se actuou para producir o resultado, aínda que quedou acreditada a súa intervención na mesma".

O Supremo destaca que a sentenza recorrida valorou "que fose ela quen gardase o cranio nunha bolsa, envolta en papel de agasallo e nunha caixa, extremo acreditado polas probas periciais sobre as impresións dixitais nas bolsas, o que permite afirmar a manipulación do paquete entregado á súa amiga e veciña".

Tamén lembra a explicación que deu a condenada mentres se investigaba a desaparición da vítima de que entregara un paquete á súa amiga con xoguetes sexuais porque non lle interesaban que aparecesen na súa casa.