Conmoción polo asasinato doutro empresario de Avión en México

Na pequena aldea de Casar do Nabo, en Avión, é onde naceu a vítima hai 66 anos. Ao longo desta mañá algúns familiares achegábanse ata a casa, onde segue residindo a nai, para darlle o pésame. Segundo os datos que transcenderon ata o momento, confirmados polo fillo da vítima, Carlos Estévez foi asasinado a tiros por tres asaltantes ás portas dun negocio familiar, unha lavandería que tiñan na área metropolitana da capital de México.

Servando Guerra, parente do falecido: "Foi a unha lavandería, buscar cartos para lle pagar á xente, e cando saíu, disparáronlle".

Segundo o relato do fillo, Carlos tratou de defenderse e tamén fixo algún disparo. Levaba unha arma desde que hai ano e medio intentaran secuestrar o seu fillo. Algúns emigrantes de aquí regresaron, precisamente, pola violencia e a inseguridade que sentían naquel país.

"Eu tamén estiven alá, pero volvín. Non quixen saber máis de México. A min asaltáronme, puxéronme a pistola na cabeza, tiráronme ao chan...", relata un veciño.

O falecido regresaba cada verán á súa aldea natal, onde a nova do asasinato causou unha gran dor, o mesmo que na localidade veciña de Espiñeiro, de onde é a súa muller. "Si, é un día triste. A min aféctame moito, e a todos. Porque non se debe quitar a vida a ninguén", confirma unha veciña.

O irmán do falecido, que reside aquí, viaxou ata México onde teñen previsto oficiar o funeral.