A chuvia provoca asolagamentos e cortes de estradas na provincia da Coruña
A chuvia provoca asolagamentos e cortes de estradas na provincia da Coruña
Cortada a AG-64 ao seu paso por Narón por asolagamentos
O temporal condiciona a circulación no inicio da operación especial de tráfico
Tráfico prevé 1,6 millóns de desprazamentos en Galicia durante o Nadal
As chuvias provocaron esta tarde preto de 190 incidencias en Galicia. A maior parte concentráronse na provincia da Coruña. Os concellos máis afectados foron os de Ferrol, Narón, Cedeira, Mugardos, Valdoviño, a comarca de Bergantiños e Santiago.
En Narón, a auga obrigou a cortar o tránsito na AG-64 en ambos sentidos debido ao rebordamento do río e aos asolagamentos da vía.
A auga tamén está causando problemas na F-11 que une a autoestrada AP9 co Polígono da Gándara.
Outras moitas estradas están invadidas por fervenzas espontáneas que impiden o paso de vehículos. É o caso da DP-3603, que vai de Ferrol a Covas, preto de Canteiras Ferrolanas.
Tamén as chuvias están deixando imaxes de rebordos e fervenzas a pé de estrada, como en Arteixo.
Nas rúas de Pontedeume, a auga dificulta tamén o tránsito de vehículos.
Na Coruña a auga inundou parcialmente o aparcadoiro dos Cantóns.
E en Santiago, os bombeiros traballan nun asolagamento na zona de Sar.
Bombeiros traballando no Sar, en Santiago
O aviso laranxa por choivas continúa activo no suroeste da provincia da Coruña ata as 6 da noite.
No resto da Comunidade mantense o aviso amarelo por precipitacións.
Tamén está activo o Plan Inungal debido á necesidade de establecer un control e seguimento do nivel dos ríos ante a posibilidade de que se produzan desbordamentos.
