Curso escolar 2024/2025: do 11 de setembo ao 20 de xuño

A Consellería de Cultura, Educación, FP e Universidades remitiu aos sindicatos o borrador do calendario do próximo curso escolar 2024/25, que prevé o arranque para o mércores 11 de setembro e que remate o venres 20 de xuño.

A Xunta expón unificar o período lectivo para todas as etapas de infantil, primaria, ESO, bacharelato e Formación Profesional. Como ocorre todos os anos, 2º de bacharelato será unha excepción, xa que a súa finalización verase condicionada polas datas da ABAU. Outra das excepcións serán as actividades lectivas nos ensinos de réxime especial: aínda que as súas clases tamén arrincarán o mércores 11 de setembro, a súa finalización será o 27 de xuño, unha semana máis tarde que o resto.

Períodos de vacacións

O borrador, que o vindeiro martes se abordará cos sindicatos na mesa sectorial, fixa os períodos de vacacións e o Día do Ensino, que será o xoves 31 de outubro, antes do festivo do venres 1 de novembro. A parada do Nadal irá do luns 23 de decembro, os alumnos finalizarán as clases o venres 20, ata o 7 de xaneiro. Por tanto, a volta ás aulas será o mércores 8 de xaneiro de 2025.

As vacacións de Entroido están previstas do luns 3 ao mércores 5 de marzo, mentres que as de Semana Santa irá do luns 14 ao luns 21 de abril, ambos os incluídos. A maiores, cada colexio e instituto terá tamén os festivos locais. No caso de que estes cadren fose do período lectivo -do 9 de setembro ao 20 de xuño-, os centros poderán remitir á Consellería, en todo caso antes do 18 de outubro, unha proposta de días non lectivos dentro da súa programación anual.

En canto ás sesións de avaliación parcial, que son as que marcan os trimestres, o borrador marca que cada centro concretará as datas "procurando unha repartición equilibrada" entre as tres. Ademais, a avaliación final -fóra de 2º de bacharelato, que está condicionada pola ABAU- deberá coincidir coa terceira parcial.

O borrador de calendario, que sempre pode sufrir modificacións ata a súa publicación final, está previsto o coñecido como período de adaptación para o alumnado de 4º de infantil, 3 anos. Así, a incorporación gradual dos nenos "non se prolongará máis aló do 13 de setembro de 2024".