Daniel Sancho declárase non culpable do asasinato premeditado de Edwin Arrieta

O español Daniel Sancho declarouse este luns non culpable do asasinato premeditado do cirurxián colombiano Edwin Arrieta en Tailandia, durante unha vista no tribunal da illa de Samui, informaron a EFE fontes próximas ao caso. Nesa vista, Sancho, de 29 anos e en prisión provisional desde o pasado 7 de agosto, negou ser culpable do asasinato premeditado do colombiano na illa de Phangan e de facer desaparecer o seu pasaporte, dous dos tres cargos na súa contra, pero declarouse culpable de ocultar partes do seu corpo.

Sancho asegurou durante a vista que a morte de Edwin Arrieta se debeu a un accidente. Así mesmo, o mozo español dixo hoxe ao xuíz que quería prescindir dos servizos do avogado de oficio Krit Sudthanom, que lle foi asignado o pasado 26 de outubro, cando o acusado compareceu ante o xuíz sen un letrado particular. Segundo dixo hoxe o propio avogado, Sancho solicitou un novo letrado, que será tamén nomeado polo tribunal.

O español non tiña avogado en Tailandia, onde só pode ser defendido por un tailandés, desde o 7 de setembro, despois de que o pai do acusado, o actor español Rodolfo Sancho, prescindise dos servizos de Anan Chuayprabat por "discrepancias na defensa". 

Rodolfo Sancho estivo presente hoxe na vista, en que o fiscal Jeerawat Sawatdichai leu ao acusado os cargos de asasinato premeditado, ocultación do corpo e destrución de documentación allea. Tamén acudiu ao xulgado o avogado tailandés que representa a familia de Edwin Arrieta, despois de que o pasado venres anunciasen que os familiares da vítima comparecerán no xuízo contra Daniel Sancho.

O mozo contou hoxe por primeira vez coa asistencia dun intérprete do tailandés ao español, tal e como solicitou o pasado 26 de outubro, cando a vista entón quedou aprazada ata hoxe por ese motivo. O día 27 de novembro celebrarase unha nova vista, en que tanto a fiscalía como a defensa presentarán as súas probas no proceso contra o español.

Sancho declarouse culpable do asasinato e o despezamento do cirurxián colombiano, o cal implica pena de morte en Tailandia, cando pasou a disposición xudicial o 7 de agosto, tras a súa confesión dous días antes na comisaría da illa de Phangan. Ao rexeitar parte dos cargos, iníciase un procedemento que inclúe unha nova declaración e exame de probas que culminará nun xuízo, que podería celebrarse entre febreiro e abril de 2024, segundo explicou a EFE a Fiscalía.

Rodolfo Sancho estivo presente na vista