Denuncian a perigosidade dun desprendemento na estrada que une Mondariz con Covelo

Hai máis dun ano as fortes chuvias provocaron un desprendemento na estrada que une os concellos de Mondariz e Covelo á altura do quilómetro cinco. Dende entón nada se fixo e os veciños da zona están preocupados. Senten moita inseguridade cando circulan por esta vía, tamén frecuentada por autobuses escolares e de liñas regulares.

Din que ás veces invaden o carril contrario para non pasar preto do desnivel, duns doce metros de altura, pero é unha manobra moi perigosa pola proximidade dunha curva e o mal estado do asfalto. Os veciños contactaron coas administracións responsables, pero seguen sen resposta.

O único que fixeron nun ano foi sinalizar o desprendemento. Os afectados están fartos da espera e agardan que a solución chegue antes de que se produza algún accidente grave.