Denuncian a presenza de tres narcopisos no barrio das Galeras en Santiago

Os veciños do barrio de Galeras en Santiago denuncian a presenza de ata tres narcopisos que están a dificultar a convivencia. Din sentir inseguridade a certas horas do día, sobre todo á tardiña e ás primeiras horas da mañá.

Inseguridade, conflitos, idas e vidas de consumidores de drogas que se meten nos portais e mesmo roubos nos locais comerciais da zona de Galeras.

Unha preocupación que se estende na zona, sobre todo desde o último ano coa presenza de tres pisos onde sospeitan que se vende droga, aumenta a sensación de inseguridade nunha zona frecuentada por menores de idade.

Conflitos cos compradores de drogas que queren meterse nos portais para consumir. Unha circunstancia que obrigou a moitas comunidades a tomar medidas como instalar cámaras de vixilancia e mesmo mudar de pechaduras, pois sofren constantes estragos. Tamén os bares e restaurantes sofren as consecuencias.

As autoridades e o Concello son coñecedores da situación, de aí que a presenza policial aumentara nos últimos seis meses. A veciñanza agarda que as investigacións policiais dean os seus froitos e poidan de novo gozar da tranquilidade que caracteriza o barrio.