Desaloxada unha discoteca de Santiago por un incendio na instalación eléctrica

O incendio de parte da instalación lumínica obrigou a desaloxar por completo unha sala de concertos en San Lourenzo, preto da zona universitaria de Santiago de Compostela.

Foi esta pasada madrugada, sobre a unha da mañá, cando a Policía Local e os bombeiros de Santiago recibían unha chamada alertando dunha gran fumareda procedente do interior do local.

"De camiño alí xa nos avisou o 112 de que na propia sala xa conseguiran extinguir o incendio e que a desaloxaran. Atopamos a sala baleira, que tiña moito fume. Fixemos unha revisión da sala con cámara térmica para que non houbera ninguén dentro. Atopamos onde estaba o foco. Acabamos de extinguilo cun extintor noso", relata Manuel Sanmartín, xefe dos Bombeiros de Santiago de Compostela.

Incendio na sala de concertos Malatesta en Santiago

Foron os propios empregados do local os que conseguiron atallar o incendio con extintores e cando os equipos de emerxencia chegaron ao lugar, o cento de persoas que había na sala asistindo a unha actuación musical, xa estaban abandonando o establecemento sen incidencias.

"Danos persoais non houbo. O que si houbo foron danos materiais. O lume afectou a instalación eléctrica e hai danos que ten que valorar agora a empresa", sinalaba o xefe de Bombeiros de Compostela.

Malia que o acontecido quedou nun susto, para a veciñanza supón un motivo máis de preocupación.

"É un local bastante conflitivo no barrio, que xa presentamos varias denuncias ao concello. Solicitamos tódalas semanas a intervención da policía local por tema de ruídos, a presenza de persoas bebendo, que bloquean a estrada e que causan moitos problemas de convivencia", apunta o presidente da asociación veciñal Río Sarela, Jon Brokenbrow.

A sala de concertos permanecerá pechada ata que técnicos do concello revisen os danos.