Desartellan en Boiro unha banda dedicada ao tráfico de drogas e deteñen oito persoas

A Garda Civil de Boiro desarticulou unha organización dedicada ao tráfico de substancias estupefacientes e detivo a 8 veciños desa localidade nunha operación bautizada co nome de Copito de Neve.

A operación iniciouse a comezo do verán do ano pasado, tras ter coñecemento os compoñentes da Unidade da existencia de diversos puntos de venda de droga polo miúdo na localidade, que estaban a causar molestias e alarma social entre os veciños da zona.

Durante as pescudas a Garda Civil logrou identificar os supostos compoñentes da organización, resultando ser 6 homes e 2 mulleres, veciños de Boiro, constatando que o xefe organizara unha rede de puntos de venda, aproveitando que os responsables dos mesmos xa tiñan relación con este tipo de delitos.

Unha vez obtidas as probas deses presuntos delitos e a localización dos inmobles nos que se realizaban, os axentes pediron autorización xudicial para o rexistro de dous domicilios. Máis tarde realizáronse outros dous rexistros en vivendas nas que os residentes accederon voluntariamente a entrada dos investigadores.

Durante eses catro rexistros comisáronse 2.055 euros en efectivo, 835 gramos de cocaína, 75 gramos de heroína, 102 gramos de haxix, 3,203 quilogramos de marihuana, varios teléfonos e munición para armas de fogo e distintos útiles para a preparación e distribución das drogas, entre outras cousas 11 básculas de precisión. 

A Garda Civil procedeu á detención destas 8 persoas como supostos autores dun delito de tráfico de substancias estupefacientes e outro de pertenza a grupo criminal.

Os detidos, xunto coas actuacións realizadas e os efectos incautados, foron postos á disposición do Xulgado de Primeira Instancia e Instrución de Ribeira, onde o xuíz decretou o ingreso en prisión do suposto líder da banda.