Deteñen catro galegos encargados da loxística dunha banda de atracadores internacionais

A cal e canto quedou pechada a casa de Vilanova que o grupo de atracadores usaba como asentamento base. Alugouna un home de Redondela coa súa parella. 

Contaron que era para uns familiares italianos da filla. E italianos eran, polo menos, dous deles. A maiores, na casa suponse que vivían dous albaneses e un marroquí. Apenas facían vida alí e case nin se deixaban ver, pero tampouco pasaban desapercibidos.

"Era xente normal, de mediana idade. Sempre os mesmos, uns señores que entraban e saían a distintas horas e distinto momento, pero case sempre se metían pola canella e deixaban os coches fóra, BMW, Mercedes e algún Audi", conta unha persoa que vía a trasfega. 

Esta era a segunda vez que alugaran co mesmo propietario en pouco máis dun ano. Da outra vez foran oito meses, pero marchaban e volvían e só ocuparon a casa unhas semanas. Desta vez o contrato era por catro meses, pero, só uns días despois de asinalo, a banda caeu en Portugal, no atraco a unha xoiería de Valença do Miño, en que se enfrontaron a tiros coa GNR, coa Garda Civil portuguesa. Era xente perigosa, que ía armada.

"Entraron dous, un con pistola e apuntaron á miña compañeira", explica a dependenta dun negocio da Raia.

Agora caeu o grupo que supostamente lles facilitaba o traballo aquí en Galicia. Un dos trámites foi precisamente elixir a vivenda, con horta e vistas ao mar. 

"Trátase de catro detidos que formaban parte do aparato loxístico de apoio a unha banda internacional que operaba fundamentalmente en Portugal, sobre todo, roubos en vivendas e establecementos comerciais. Os detidos actuais son tres homes e unha muller, que foron arrestados en Redondela, Vigo e Pazos de Borbén", sinala Abel Losada, subdelegado do Goberno de Pontevedra.

No rexistro da vivenda, atoparon moitos teléfonos móbiles e uns 120.000 euros. Os detidos galegos declaran mañá na Audiencia Nacional, porque hai unha orde de detención europea.