Deteñen dous ecoloxistas por atacar unha pintura de Velázquez

Dous ecoloxistas do grupo Just Stop Oil foron arrestados este luns na National Gallery de Londres tras romper o cristal que cubría 'A Venus do espello', unha pintura de Velázquez do século XVII. Segundo a Polícia Metropolitana londiniense, os manifestantes empregaron martelos de seguridade co obxectivo de quebrar o cristal que cobre a obra.

Pola súa banda, o grupo ecoloxista Just Stop Oil afirmou que esta acción é unha advertencia para o Goberno británico, solicitando a detención inmediata dos novos proxectos de extracción de gas e petróleo no mar do Norte aprobados polo Executivo Rishi Sunak. Ademais, preto de 40 membros da organización foron arrestados despois por obstrución do tráfico preto da residencia oficial do Goberno de Downing Street.

O grupo Just Stop Oil xa identificou os manifestantes detidos en Londres. Hanan, de 22 anos, e Harrison, de 20, foron os autores do asalto a 'A Venus do espello', porén non é a primeira vez que esta obra de arte de Velázquez é atacada xa que a sufraxista Mary Richardson intentouno en 1914.

Nun comunicado, a organización ecoloxista sinalou que "é hora de feitos, non de palabras. É hora de simplemente deter o petróleo. A política está a fallarnos. Falloulles ás mulleres en 1914 (polas sufraxistas) e estanos fallando agora". Ademais, agregan que este novo petróleo e gas "matará millóns de persoas", facendo un chamamento á cidadanía para deter estes proxectos.

Penas máis severas

O goberno británico endureceu recentemente as penas por este tipo de altercados. Dous militantes de Stop Oil foron condenados en abril a tres anos de cárcere por despregar unha pancarta nunha ponte de Londres e causar problemas de tráfico durante horas.

Outros dous activistas de Stop Oil serán xulgados o ano que vén por lanzar sopa sobre o cadro dos Xirasois de Van Gogh.