Deteñen un home e a súa nai octoxenaria por torturar e asasinar a un mozo en Alacant
Deteñen un home e a súa nai octoxenaria por torturar e asasinar a un mozo en Alacant
A vítima é un mozo alxerino de 18 anos que faleceu tras ingresar nun hospital practicamente en morte cerebral
Segundo os investigadores, os acusados enviaran á familia vídeos e fotografías mentres o torturaban esixíndolles un pago de 30.000 euros
![](https://img-g24-crtvg.flumotion.com/prog24/2023/20230914/detidos-alacant-tortura-asasinato-140923.jpg)
Unha muller de 81 anos e o seu fillo, de 40, foron detidos pola Policía Nacional acusados de torturar durante quince horas e asasinar un mozo alxerino de 18 anos, ao que deixaron en morte cerebral e que faleceu un día despois nun hospital de Alacant.
O corpo policial explicou que o móbil dos feitos podería ser o de extorsionar a familia do falecido, á que enviaron fotos e vídeos do mozo mentres o torturaban esixíndolles un pago de 30.000 euros a cambio de soltalo.
A Policía Nacional informa de que o home ingresou en prisión provisional acusado dos delitos de asasinato, secuestro e contra a intimidade, mentres que a nai foi posta en liberdade tras a súa comparecencia no xulgado.
Estas fontes destacaron que o día 7 deste mes recibiron unha comunicación do consulado de Alxeria en que se facía referencia a un posible secuestro dun cidadán alxerino residente na cidade, tras recibir vídeos e fotos deste mozo en lamentables condicións e como ferramenta de presión para conseguir 30.000 euros.
Nestas fotos, a vítima aparecía tendida no chan decúbito supino, coa cara tapada cunha fregona, sangrando e moi magoado.
Tras falecer o mozo, a autopsia revelou que morreu por mor dun forte traumatismo provocado por un golpe con algún obxecto contundente na cabeza, motivo polo que ingresou practicamente en morte cerebral, o que lle produciu á vítima unha hemorraxia cerebral e un edema, derivando nun fallo multiorgánico.
Os axentes estableceron que a vítima e o arrestado levaban días discutindo sobre un roubo do primeiro ao segundo e que na madrugada dos feitos o arrestado presentouse na vivenda da vítima insistindo en recuperar as súas pertenzas, podendo ser este o momento no que debeu producirse unha discusión que concluíu coa vítima ferida.
Entón, presumiblemente coa axuda da súa nai, o home empezaría a torturar o mozo, asañándose ata deixalo practicamente sen vida e expoñendo imaxes nas redes sociais, subliñou o corpo policial.