Detida unha muller de 56 anos acusada de matar a súa parella en León
Detida unha muller de 56 anos acusada de matar a súa parella en León
Supostamente a muller agrediu o home, de 77 anos, cunha arma branca no pescozo no interior da vivenda que compartían
Ao parecer, a parella xa se denunciara mutuamente. Eran moi coñecidos porque mantiñan unha relación "problemática"
![](https://img-g24-crtvg.flumotion.com/prog24/2022/20220622/guardiacivilcoche.jpg)
Unha muller de 56 anos foi detida esta madrugada acusada de matar a súa parella, un home de 77. Supostamente a muller agrediu o home cunha arma branca no pescozo no interior da vivenda que compartían na localidade leonesa de Villagarcía de la Vega, no municipio de San Cristóbal de la Polantera, segundo confirmou a Subdelegación do Goberno.
O suceso produciuse pouco despois da unha desta madrugada na vivenda en que residía a parella, nos arredores de Villagarcía de la Vega. Ata alí desprazouse unha dotación da Garda Civil (COS) de León e Emerxencias Sanitarias-Sacyl, que enviou unha UVI móbil, tras ser requiridos polo 112 de Castela e León.
O persoal sanitario, ao chegar a vivenda, só puido confirmar o falecemento do home agredido e os axentes da Garda Civil detiveron á muller, que está acusada dun delito de homicidio doloso.
Axentes da Garda Civil permanecen na vivenda onde se produciron os feitos solicitando probas antes de poñer a disposición xudicial á detida, que está acusada dun delito de homicidio doloso.
O alcalde de San Cristóbal de la Polantera, Francisco Ramos, explicou aos medios que a parella non estaba casada e era moi coñecida porque mantiñan unha relación "problemática".
Fontes da investigación indican que a parella xa se denunciara mutuamente por violencia machista, no caso das interpostas pola muller contra a súa parella, e por violencia doméstica, as que puxera o falecido.
O xuíz, quen decretou segredo de sumario, será o que determine en que situación se atopaban esas medidas impostas por esas denuncias por se puidese ser relevante para a instrución do caso.
Os veciños da localidade explicaron que a parella era moi coñecida polas súas habituais desavinzas, aínda que precisaron que adoitaban rematar en reencontros.