Detido en Londres por agredir un traballador de emerxencias e acoitelar dous policías

Dous policías foron apuñalados este venres por un home sobre as 6:00, hora local, no centro de Londres e están hospitalizados nun incidente do que se descoñecen as circunstancias aínda que non garda, por agora, relación con terrorismo, segundo informou a Policía Metropolitana.

Nun conciso comunicado, Scotland Yard indicou que no suceso ocorrido na céntrica praza de Leicester "utilizouse unha pistola de descarga eléctrica e un home foi detido como sospeitoso de ocasionar danos físicos e agredir un traballador dos servizos de emerxencia".

Descártase, de momento, que o ocorrido teña algunha relación con actividades de terrorismo.

Os dous axentes reciben atención médica nun hospital, do mesmo xeito que a terceira vítima, segundo revelou o corpo policial na súa nota, aínda que polo momento descoñécese cal é o seu estado de saúde.

A policía agregou que "levan a cabo investigacións para esclarecer as circunstancias que rodean o incidente".

O suceso prodúcese no momento no que a capital británica despide a raíña Isabel II, cuxo funeral de Estado se celebrará o próximo luns, e na que milleiros de persoas, moitas delas chegadas desde outros lugares do país, pasan a diario pola capela ardente da monarca falecida.