Detido un home polo asasinato dunha moza en Xirona coa que mantivo unha relación

Os Mossos d'Esquadra detiveron un home en relación coa morte dunha muller de 27 anos. O cadáver, atopado este xoves nun piso da cidade de Xirona, tiña sinais de violencia.

Fontes da investigación indicaron que o detido, que foi arrestado na mesma cidade de Xirona, mantivera unha relación sentimental coa vítima.

Os Mossos recibiron un aviso en que se informaba de que había unha muller morta nun piso.

Diversas dotacións policiais desprazáronse ao lugar dos feitos, do mesmo xeito que efectivos do Sistema de Emerxencias Médicas (SEM) que só puideron confirmar a morte da muller.

A División de Investigación Criminal dos Mossos d'Esquadra abriu unha investigación para clarexar os feitos, que levou á detención do presunto autor do crime.

O Concello de Xirona convocou unha concentración silenciosa esta mañá ás 11.30 horas na praza do Vi para condenar o asasinato.

EFE/David Borrat

De confirmarse que se trata un asasinato machista, coa muller de Xirona serían 30 as vítimas mortais por violencia machista no que vai de 2023 e a sexta en Cataluña, segundo a estatística da Delegación do Goberno para Violencia de Xénero.

Para atender posibles vítimas de violencia machista, os recursos dispoñibles as 24 horas do día son o teléfono 016, o correo electrónico 016-online@igualdad.gob.es e a canle do WhatsApp no número 600 000 016. 

Nunha situación de emerxencia pódese chamar ao 112 ou aos teléfonos de emerxencias da Policía Nacional (091) e da Garda Civil (062) e, cando a chamada é imposible, pódese recorrer á aplicación ALERTCOPS, desde a que se enviará un sinal de alerta á policía con xeolocalización.