Detidos con 6.500 plantas de marihuana valoradas en máis de dous millóns de euros
Detidos con 6.500 plantas de marihuana valoradas en máis de dous millóns de euros
Unha vez listas para a súa distribución, as plantas sumarían un peso total de 2.500 quilos
Endesa realizou 50 desenganches de electricidade, xa que as instalacións dos invernadoiros se alimentaban de conexións clandestinas
![Imaxe de arquivo dunha plantación de marihuana desmantelada pola Policía Nacional](https://img-g24-crtvg.flumotion.com/prog24/2022/20221204/MARIHUANABARCELONA.png)
A Policía Nacional detivo catro presuntos responsables dun cultivo de marihuana situado en Matagorda, en El Ejido (Almería), no que foron localizadas 6.500 plantas, cuxo valor superaría os dous millóns de euros no mercado ilícito.
Segundo unha nota da Comisaría Provincial de Almería, a operación Ceniza comezou hai varios meses, despois de que os investigadores soubesen dun grupo dedicado ao cultivo de marihuana a grande escala na barrriada de Matagorda, na zona coñecida como El Pozo de la Tía Manolica, un dos maiores puntos negros de cultivo e venda de marihuana da provincia.
A despregadura operativa comezou na madrugada do 10 de xullo e involucrou máis de 50 axentes de policía de diferentes brigadas coa colaboración do Grupo Operativo de Apoio Policial (GOAP) da Policía Local do municipio de El Ejido e persoal técnico de Endesa, encargados de localizar gran cantidade de enganches fraudulentos á rede eléctrica.
Practicáronse catro detencións e catro entradas e rexistros en vivendas en Matagorda e tamén actuacións en seis invernadoiros do lugar onde se interviñeron un total de 6.500 plantas de marihuana en proceso final de crecemento.
Unha vez listas para a súa distribución, as plantas sumarían un peso total de 2.500 quilos e o valor da droga aprehendida estímase que superaría os dous millóns de euros no mercado.
Os rexistros, autorizados polo Xulgado de Instrución número 6 de El Ejido, permitiron tamén a incautación de dúas armas de aire comprimido, unha escopeta e unha pistola. Ademais, interviñéronse 700 gramos de gromos de marihuana en seco, 20 gramos de haxix e 2.500 euros en efectivo.
Pola súa banda, Endesa realizou 50 desenganches de electricidade, xa que as instalacións dos invernadoiros se alimentaban de conexións clandestinas.