Dez desaparecidos nun novo accidente mineiro en Polonia

Dez mineiros permanecen desaparecidos tras o tremor rexistrado este sábado nunha mina de carbón de Zofiówka, no sur de Polonia, só uns días despois dun accidente similar noutra galería próxima que deixou cinco mortos.

"Outra noticia devastadora de Silesia: ás 3.:40 horas produciuse un potente tremor na mina Zofiówka, en Jastrzebie Zdrój. Hai en marcha unha operación de rescate. Por desgraza, aínda non hai contacto con dez mineiros", confirmou o primeiro ministro polaco, Mateusz Morawiecki, na súa conta de Facebook.

O mandatario polaco, que chegou ao lugar da catástrofe á primeira hora da tarde, sinalou que a operación de rescate segue en marcha e que os equipos de salvamento teñen que percorrer aínda máis de 300 metros para chegar ata os mineiros, informa a axencia polaca PAP.

A dirección da mina sinalou que no momento do tremor atopábanse na zona de perigo, a 900 metros de profundidade, 52 mineiros, 42 dos cales puideron saír ao exterior ilesos e polo seu propio pé.

Agregou que a procura dos dez mineiros atrapados é complicada polo escape dunha gran cantidade de metano, o que supón un perigo para os equipos de rescate.

Segundo accidente nunha semana

O martes pasado rexistrouse outro accidente nunha mina situada na mesma provincia, en Pniówek. Varias explosións por acumulación de gas metano rexistradas nun túnel a mil metros de profundidade deixaron cinco mineiros mortos e 21 feridos.

Morawiecki afirmou que todo o ocorrido tanto na mina de Pniówek coma na de Zofiówka "será revisado ​​moi meticulosamente" para determinar se houbo "erros humanos" ou se "só as forzas da natureza" son as responsables.