Un cigarro podería ser a orixe do incendio nunha residencia de Zaragoza en que morreron 10 persoas

Un cigarro podería ser a orixe do incendio na residencia de Villafranca de Ebro (Zaragoza) en que faleceron este madrugada dez persoas, todas elas residentes con diferentes graos de discapacidade, e outras dúas resultaron feridas, segundo indicou a xerente da asociación Arade, que xestiona a residencia, Paquita Morata.

Así o indicou en declaracións aos medios de comunicación ás portas do centro acompañada pola directora, Carmen Torrijo, nas que trasladou as súas condolencias ás familias e achegados dos falecidos ante "unha desgraza terrible".

Indicou que a Garda Civil investiga as causas do incendio, pero apuntou que probablemente se produciu cando alguén fumou nunha habitación, algo que está prohibido.

"Hai veces que as desgrazas non se poden evitar", engadiu a xerente da asociación, quen agradeceu aos traballadores do centro o seu labor, porque "grazas a eles non houbo máis falecidos".

"Son momentos moi duros para a xente do centro porque queren os usuarios como a súa propia familia", salientou, á vez que asegurou que neste centro psicoxeriátrico, con residentes maiores e mozos con problemas de saúde mental, se traballa "moi correctamente", conforme á lexislación aragonesa.

Engadiu que o centro cumpre a lexislación, tamén a normativa aplicable sobre incendios, e conta con portas cortalume, e que nel se fan inspeccións continuas e simulacros de evacuación todos os anos.

A xerente fixo fincapé en que foi un suceso "fortuíto" e que no momento do incendio, de madrugada, no centro estaban as dúas traballadoras estipuladas legalmente, máis persoal localizable.

Explicou ademais que o novo centro de Vitalia Huesca ao que foron trasladados aínda está por abrir e nel "poderán estar tranquilos e ben adaptados", xa que tamén acolle os traballadores da residencia para continuar coa súa atención.

Os internos recibirán apoio psicolóxico para que superen o ocorrido canto antes.

Unha porta cortalume freou a propagación do fume

O lume afectou unicamente un dos cuartos do centro, desde o que se propagou unha gran cantidade de fume nunha das dúas ás das instalacións, mentres que a outra quedou intacta grazas a unha porta cortalume.

O inspector xefe de Bombeiros e Protección Civil do Concello de Zaragoza, Eduardo Sánchez, informou aos medios de comunicación, ás portas da residencia, dunha soa planta, das circunstancias nas que se produciu o lume, que se iniciou nun cuarto en que había un residente.

Explicou que as chamas non saíron desa habitación, pero si o fume, cuxa inhalación adoita ser a causa dos falecementos neste tipo de sucesos, e que a residencia ten unha porta devasa que "funcionou", co que o incendio afectou a unha das dúas ás, na que estaban aloxados os falecidos; o resto de edificio quedou a salvo.

"É unha das circunstancias que non queres ver nunca", recoñeceu Sánchez, quen confirmou que o xuíz xa está a levar a cabo as dilixencias oportunas.

Os bombeiros recibiron o aviso minutos antes das cinco da madrugada e ata a residencia desprazaron sete vehículos, sanitarios e un autobús en previsión de ter que trasladar os usuarios, cuxa evacuación xa comezara, e centráronse en concluír ese labor e na extinción do incendio. 

Unha residencia de Huesca acolle os 57 internos ilesos e o persoal das instalacións sinistradas

As 57 persoas que foron trasladadas á residencia de Vitalia en Huesca desde a de Villafranca de Ebro incendiada permanecerán neste lugar o tempo que o Gobierno de Aragón "estime conveniente".

O director de operacións do Grupo Vitalia, Antonio Morais, recibiu os 57 trasladados, maiores dependentes e persoas con enfermidade mental, despois do requirimento feito de urxencia polo Executivo autonómico este venres, pola necesidade de recolocar os residentes que saíron ilesos do incendio.

Non hai unha previsión concreta do tempo que poidan permanecer na residencia Vitalia Huesca, un centro que está "absolutamente acabado" e listo pero aínda non operativo a falta dunha autorización administrativa para comezar a funcionar en decembro.

Da atención dos residentes encargarase o persoal que xa o facía na residencia sinistrada, aínda que en Vitalia prepararon a primeira atención, coa elaboración dun menú para estas 57 persoas.

A partir de agora, será a residencia de orixe, en colaboración co Goberno de Aragón, a que xestione a loxística para a atención dos novos residentes.

Á chegada a Huesca, Ángel Val, o compañeiro dun dos falecidos que ía en cadeira de rodas relatou aos medios, moi afectado, que tentou axudar ao seu amigo, pero non espertou.

Outra muller, Cruz, de 62 anos, contou que de madrugada as traballadoras tocaron en todas as portas para que as persoas que puidesen saír polos seus propios medios o fixesen e, á vez, axudasen a quen ía en cadeiras de rodas.

Mostrou ademais o seu agradecemento aos equipos de rescate, da Garda Civil, sanitarios e traballadoras do centro, así como aos veciños.

32 residentes e un garda civil atendidos por inhalación de fume

O Servizo de Urxencias e Emerxencias Sanitarias​, o 061, atendeu na residencia de Villafranca de Ebro 32 residentes e un garda civil, a todos eles por inhalación de fume e con prognóstico leve, salvo dúas persoas que foron trasladadas ao Hospital Royo Villanova.

Segundo informaron fontes do Goberno de Aragón, un dos trasladados a este centro hospitalario é un home de 65 anos que está ingresado na UCI con prognóstico grave, e o outro é un home de 72 anos que permanece en observación en urxencias e atópase estable.