Diego Calvo: "Espero que o novo Goberno tome en serio a relación con Galicia"

O vicepresidente primeiro da Xunta e conselleiro da Presidencia, Xustiza e Deportes, Diego Calvo, pídelle ao novo Goberno de Pedro Sánchez que cambie a súa "actitude con Galicia".

Nas vésperas de que transcenda a composición do novo executivo de coalición, nunha entrevista na Radio Galega, Diego Calvo expresaba o seu desexo de que varíe a actitude do Goberno de Sánchez coas comunidades autónomas e "tomen en serio as relacións con Galicia".

Segundo argumentou no Galicia por diante fin de semana, hai moitos asuntos de competencia estatal que seguen pendentes a día de hoxe e "queremos que nos dean contestación". 

"A nós gustaríanos que cambiase a actitude con respecto a Galicia. Temos moitos asuntos pendentes, moitos asuntos dos que levamos meses sen ter noticias e cando tiñamos noticias eran moi desalentadoras. Eu espero que tomen en serio as relacións coas comunidades autónomas e tomen en serio a relación con Galicia".  

Diego Calvo asegura que sobre o AVE,  coa chegada dos trens Avril a Galicia, o arranxo da A-6 ou a aposta decidida polo Corredor Atlántico Noroeste de Mercadorías son prioridades, así como que o Goberno rectifique no seu recurso de inconstitucionalidade contra a lei galega do litoral.

Sobre este asunto, Calvo di que lle gustaría que o Goberno "fose quen de poder rectificar".

"De dicir que se equivocaron no seu momento e que podemos chegar a un acordo e que loxicamente entra dentro das nosas competencias".

Con todo, admite ter "poucas esperanzas sobre todo polas formas nas que o Goberno central estivo a desenvolver durante estes meses a súa actividade". Mesmo cualifica de "chiste"que dende o Goberno se chegara a dicir que a lei galega do litoral "era unha declaración de independencia". 

Conferencia de presidentes

O vicepresidente primeiro da Xunta insiste na necesidade de que o presidente do Goberno convoque a conferencia de presidentes para explicar os posibles efectos dos pactos de investidura nas comunidades así como a futura lei de amnistía. De feito, tras asegurar que a están estudando, avisa que "imos defender a Galicia por riba e todo".

"Que non sigan a tomar isto a broma, que non pensen que se pode facer o que sexa, que se poden adaptar as leis, que se poden torcer ata puntos insospeitados para poder seguir gobernando. Queremos que convoquen esa conferencia de presidentes, que chamen a todas as comunidades. Loxicamente, a lei de amnistía e todo iso estamos a estudala e veremos o que imos facer pero que ninguén dubide de que imos defender Galicia por riba de todo". 

Orzamentos da Xunta 2024

Na véspera de que o pleno do Parlamento galego acolla o debate de totalidade do Proxecto de lei de orzamentos da Xunta para 2024, Diego Calvo asegura que a normalidade desta tramitación é a gran diferenza entre o Goberno galego e o central.

Segundo a súa tese, no Goberno de España dende a convocatoria electoral das xerais de xullo ata o día de hoxe "non traballou ninguén" e "nós pola contra, o que seguimos foi mantendo esa illa de estabilidade, ese goberno que se seguía a preocupar polos problemas dos cidadáns".

"Con este orzamento, o que facemos unha vez máis, o que facemos todos os anos que goberna o PP, é que o novo orzamento entre en vigor o un de xaneiro de 2024".

Algo que para o vicepresidente é motivo de orgullo porque di que é "a garantía desa estabilidade, dun goberno serio".