Dobra a taxa de alcolemia en Pontevedra co seu fillo de dous anos no coche
Dobra a taxa de alcolemia en Pontevedra co seu fillo de dous anos no coche
A súa acompañante non puido facerse cargo do vehículo, ao dar tamén positivo
Imaxe de arquivo dun vehículo da Policía Local de Pontevedra
A Policía Local de Pontevedra denunciou un condutor que deu positivo en alcoholemia por máis do dobre do valor permitido cando circulaba cunha acompañante que tamén deu positivo e co seu fillo, duns dous anos de idade, no asento traseiro.
Segundo informou o Concello de Pontevedra o suceso tivo lugar no marco dun control de alcoholemia realizado durante a madrugada do pasado sábado 28 de setembro na Rúa da Barca.
O home circulaba cun vehículo de alta gama e deu positivo cunha taxa de 0,65 miligramos de alcol por litro de aire expirado, máis do dobre do permitido e constitutiva dun presunto delito contra a seguridade viaria. Ademais a súa acompañante non puido facerse cargo do vehículo ao rexistrar unha taxa de 0,40.
Finalmente, tivo que ser un dos avós do neno o que se achegase ao lugar para recoller o coche e levar a todos os seus ocupantes.
A Policía Local de Pontevedra informou de que, nos diversos controis de alcoholemia e drogas realizados a pasada fin de semana na cidade, detectaron un total de 14 resultados positivos, sete deles por alcoholemia e outros sete por conducir baixo o efecto das drogas.
As sancións ás que se enfrontan os condutores denunciados por alcoholemia son dunha multa de entre 500 e 1.000 euros ademais da retirada de 4 ou 6 puntos do seu carné sempre que a taxa rexistrada no control fose inferior a 0,60 mg/l. No caso dos positivos por drogas, as sancións serán de 1.000 euros e a retirada de 6 puntos do carné de conducir.
