Once traiñeiras galegas buscan a gloria na clasificatoria da Concha
Once traiñeiras galegas buscan a gloria na clasificatoria da Concha
Haberá seis en categoría feminina e cinco na masculina
Os dous equipos que presenta Cabo da Cruz son os que máis opcións teñen
Doce traiñeiras galegas afrontan a partir deste mércores (18:00 na G2 e G24 a clasificatoria feminina) unha das citas estelares da temporada: a clasificatoria da Bandeira da Concha.
Na categoría feminina serán seis botes os que defendan o prestixio do remo galego. Cabo da Cruz, sétima na Liga Euskotren, é a que conta con máis papeletas para entrar. Tamén buscarán a súa presenza Chapela (sería a terceira consecutiva) e Tirán, que tamén participou na Euskotren.
Para Mugardos-A Cabana, Cesantes ou Perillo é máis un premio de final de temporada e o reto de comparar o seu potencial coas grandes do remo vasco. Rianxo tamén estaba apuntada, pero logo do falecemento do seu patrón, Adrián Neo, rexeitou a posibilidade de viaxar a Euskadi.
Na masculina (xoves, 18:00 na G2 e G24) haberá cinco representantes. Os dous equipos da Liga Euskolábel, Cabo e Samertolameu, xa se mediron aos que van ser os principais favoritos para ocupar os sete postos que se rivan. Por resultados, Cabo é a que ten máis papeletas pero terá que facer unha gran clasificatoria diante de rivais directos como Ondarroa, Lekeitio, Getaria, Kaiku ou Santurtzi.
Desde a Liga Galega chegan Ares, Bueu ou Tirán que demostraron un gran nivel ao longo da temporada. De feito o equipo aresán estivo por diante de Samertolameu no campionato galego. Os tres saben que meterse entre os sete primeiros sería unha sorpresa maiúscula.
