Dous feridos ao chocar un coche contra un muro na Coruña

Un vehículo que circulaba á altura do número 3 da Avenida de Glasgow, en San Cristovo das Viñas, saíu da vía, bateu contra o aparcadoiro dunha casa e rematou chocando contra outros catro vehículos que estaban estacionados deixando a dúas persoas feridas.

Ata o lugar desprazáronse os bombeiros herculinos que foron avisados da posibilidade de que algún dos feridos puidese estar atrapado entre o muro e o mesmo coche accidentado, porén, os profesionais comunicaron ao 112 Galicia que, aínda que colaboraron na evacuación dos feridos, non foi preciso utilizar o material de liberación.

Ás 16:00 horas desta tarde varios particulares contactaron co 112 Galicia para informar do suceso. Algún dos alertadores indicaba que escoitara un forte ruído dende a súa casa e que vía coches parados e parte do muro dun aparcadoiro caído.

Ata o lugar acudiron Urxencias Sanitarias de Galicia-061, Bombeiros da Coruña, Policía Local e efectivos da Agrupación de Voluntarios de Protección Civil da cidade.

Os profesionais sanitarios confirmaron o traslado das dúas persoas que resultaron feridas.