Dous feridos tras unha explosión nunha carnicería de Ferrol

Dous técnicos dunha empresa de frío industrial quedaron feridos sobre as 17:15 horas deste luns ao producirse unha explosión nunha carnicería situada á altura do número 37-39 da rúa Mosteiro de Monfero, no barrio ferrolán de Ultramar.

Segundo informou o servizo de Urxencias Sanitarias de Galicia, son dous homes de 48 e 63 anos respectivamente. A deflagración produciuse durante a manipulación do gas refrixerante e os dous operarios sufriron queimaduras e foron afectados pola inhalación de gases; daquela, trasladáronos de inmediato en ambulancia ao Hospital Arquitecto Marcide de Ferrol. Ademais, no punto tamén estaba o propietario do local, que non requiriu asistencia.

Tanto as ventás da carnicería como dous vehículos que estaban estacionados na zona sufriron danos. Ademais, os Bombeiros de Ferrol inspeccionaron o primeiro piso e o garaxe por posibles danos. Á zona desprazáronse un bo número de efectivos da Policía Local de Ferrol e Policía Nacional da comisaría de Ferrol-Narón, ademais de varias ambulancias de Urxencias Sanitarias de Galicia-061.