Dous goles no engadido do primeiro tempo permítenlle ao Fortuna rachar a serie negativa
Javi Domínguez, en propia porta, e Jordi Escobar marcaron os goles da remonta en menos de tres minutos
O equipo de Fredi volve gañar despois de tres partidos perdidos
Precisaba o triunfo o Celta Fortuna despois de encadear tres derrotas seguidas e conseguiuno diante do Real Unión. Comezou perdendo porque o equipo vasco conseguiu adiantarse cun tanto de Sergio Benito no minuto 38. Pero o engadido do primeiro tempo resultou providencial para os vigueses que marcaron dous goles en menos de tres minutos. No 47 un centro de El Abdellaoui tocouno o ex xogador do filial celeste Javi Domínguez para poñer o empate. E no 49 Jordi Escobar marcou nun rexeite dun disparo de Antañón.
O segundo tempo tivo moito menos ritmo. Tincho puido marcar o terceiro cun remate ao pau e o Real Unión perdeu boa parte das súas opcións de empatar ao quedaren con dez por expulsión de Berto Cayarga no 75. Festexou o triunfo un Fortuna que se volve afastar dos postos de perigo da Primeira Federación.
