Dous mortos ao caer o seu coche ao río Eo no límite de Asturias coa provincia de Lugo

Dous homes de 39 e 36 anos faleceron tras caer o seu coche ao río Eo cando circulaban por unha estrada comarcal de San Tiso d'Abres, concello asturiano situado na parte máis occidental da comunidade, no límite coa provincia de Lugo.

Os dous eran veciños da zona: o maior deles, que conducía o coche accidentado, residía no concello da Veiga, mentres que o outro falecido, que ía no asento do copiloto, era do mesmo municipio de San Tiso, segundo informaron a EFE fontes da Garda Civil. Unha das vítimas tiña un negocio no concello lugués de Ribadeo

O accidente produciuse cara ás 23:25 horas de onte, martes, cando o vehículo, un coche tipo pick-up, saíu da vía na ponte da estrada ST-1 que salva o río Eo para dar acceso á capital do concello, segundo o Servizo de Emerxencias do Principado.

O vehículo chocou contra o bordo dunha beirarrúa e contra a varanda da ponte, que cedeu e permitiu a súa caída ao leito do río.

O Centro de Coordinación de Emerxencias do 112 Asturias recibiu ás 23:42 horas deste martes unha chamada en que se alertaba de que escoitaran un golpe e crían que podía ser un accidente.

Tras ir comprobalo, os alertadores indicaron que un vehículo se precipitara pola ponte, que caeu ao leito do río, que estaba mergullado e que crían que polo menos había unha persoa no seu interior.

De inmediato mobilizouse a sete efectivos de bombeiros dos parques de Varres e Valdés, que comprobaron que veciños da zona tentaban sacar o coche do río coa axuda dun tractor, pero que non o conseguiron.

Os bombeiros iniciaron as tarefas de rescate, e cando lograron sacar o vehículo da auga, á 01:11 horas, comprobaron que as portas do mesmo estaban abertas e que non había ningunha persoa no seu interior polo que se iniciou un rastrexo polo río.

Á 01:49 horas localizaron o corpo sen vida dun home e 25 minutos despois un segundo ocupante, que tamén falecera.