Empresas galegas renuncian a visitar novos mercados de gran potencial comercial

Ante as barreiras que levantan os Estados Unidos, Europa desvía o rumbo cara a mercados alternativos. A UE anima as súas empresas a estreitar relacións con outros países, dende o Mercosur ao sueste asiático.

Pero en Galicia aínda miramos con reticencia cara a algunha desas áreas. Misións que se fan dende aquí a Asia Central quedan ás veces desertas, porque moitas empresas non o teñen claro para buscar oportunidades alí.

As entidades de promoción comercial din que eses mercados teñen moito potencial aí e que hai que animarse a descubrilos.

"Hai áreas como o golfo Pérsico ou Oriente Medio moi emerxentes, países como Emiratos Árabes, Arabia Saudita ou Omán", sinala Augusto Álvarez-Borras, o director de Internacionalización do Igape".

"Todos os 'tans', países como Uzbekistán, etcétera. Aí organizamos misións que ás veces quedan desertas", apunta Víctor Varela, o director xerente da Cámara de Comercio de Pontevedra, Vigo e Vilagarcía. "Existe unha certa percepción de que ir a eses países é complicado e son países cunhas grandes oportunidades".

Pois alí, en Asia Central, acaba de dar os primeiros pasos a presidenta da Comisión Europea, que foi a Uzbekistan a abrir un camiño que poidan seguir tamén empresas galegas. "É verdadeiramente o inicio dunha nova era na nosa antiga amizade", declarou en Samarcanda Úrsula von der Leyen.

"Algúns deses países nadan en petróleo", di o xerente da Cámara de Comercio de Pontevedra, Vigo e Vilagarcía, "e necesitan infraestrutura, bens de consumo e van ter unha clase media potente".

"O metal mecánico, o auxiliar do naval, todo o paquete do agroalimentario galego", son os sectores con proxección nesas áreas, din dende o Igape.

O consello de sempre vale na economía: non poñer todos os ovos, nin todos os contedores, no mesmo cesto.