En liberdade os nove detidos o domingo en Santiago tras unha manifestación en solidariedade con Palestina

As nove persoas detidas en Santiago de Compostela pola súa suposta participación nuns incidentes rexistrados tras unha manifestación en solidariedade con Palestina foron postos en liberdade.

Segundo fontes próximas á investigación, os nove arrestados quedaron en liberdade na medianoite deste  luns tras permanecer desde mediodía nos calabozos da Comisaría compostelá, onde prestaron declaración sobre o sucedido.

Os feitos ocorreron cando un grupo de manifestantes se dirixiron aos locais de venda de comida rápida que se atopan na rúa da Senra ao considerar que estas empresas colaboran con Israel.

Alí, varios axentes da UIP interviñeron e detiveron nove persoas.

Durante toda a tarde do domingo, decenas de persoas concentráronse ás portas da comisaría santiaguesa, situada a uns 250 metros do lugar dos altercados, e permaneceron alí ata a medianoite, cando os arrestados foron postos en liberdade.

Nove axentes feridos

A raíz destes feitos, o Sindicato Unificado de Policía condenou "a violencia" que empregou un grupo de persoas e aludiu, en concreto, a un grupo que entrou no Burger King unha vez finalizada a manifestación.

Segundo a versión do SUP, empezaron a increpar traballadores e clientes que se atopaban nese momento no establecemento lanzando panfletos no interior.

O SUP sostén que os axentes foron agredidos con paraugas e mazas de tambor, polo que, neste escenario, procederon á detención de cinco deles e incide en que a violencia para exercer a desobediencia "foi extrema".

De feito, apuntan que hai nove axentes feridos, un deles co cóbado fracturado, polo que o sindicato comparecerá na causa como acusación particular.

Tranquilidade na protesta

A protesta discorreu con tranquilidade con miles de persoas clamando, baixo a choiva, contra "o ano de masacres e destrución" de Israel a Palestina e esixindo a "ruptura de relacións" co país gobernado por Benjamín Netanyahu.

Durante a xornada tamén conmemoraron a "digna resistencia" do pobo de Palestina, en Gaza e no "resto da Palestina histórica, contra os "76 anos de ocupación".

O BNG contrapuxo a "represión" policial coa "inacción"cos ultras do Málaga

O Bloque Nacionalista Galego contrapuxo a "represión" que exerceu a policía nesta manifestación coa "inacción" dos axentes cos ultras do Club de Fútbol do Málaga que se desprazaron á Coruña esta fin de semana para asistir a un partido de fútbol e que protagonizaron desfeitas nun bar da cidade herculina.

Este luns, o deputado do Bloque no Congreso, Néstor Rego, demandou explicacións ao Ministerio do Interior polo que entende como actuacións policiais "inxustificables" ao realizar "cargas contra persoas que protestaban pacificamente" mentres se produciron "fallos de coordinación e moita permisividade" cos ultras malagueños.

"Mentres cargaban en Compostela contra xente pacífica, non actuaron na Coruña contra os ultras violentos do Málaga", aseverou Rego, segundo recolle un comunicado.

Rego ve "curioso" que "ningunha destas persoas violentas" fosen detidas e que, mesmo, chegasen a ser "escoltados" ata os hoteis onde se aloxaban durante a noite do sábado despois de protagonizar desfeitas nun bar nas inmediacións de Riazor e "atemorizar" a xente pola rúa.

O domingo, continúa Rego, "a violencia volveu ser protagonista" con altercados no centro da cidade antes de que asistisen algúns dos membros deste grupo ao partido, que fora declarado de alto risco e, por tanto, contaba cun dispositivo de seguridade especial.

"Houbo fallos, falta de previsión, descoordinación e moita permisividade por parte do dispositivo de seguridade da Delegación do Goberno en relación co violento grupo de ultras do Málaga FC", aseverou.  Rego pide a Interior que explique por que lles permitiron moverse "con total impunidade" pola cidade da Coruña.