En Toro engalanan as rúas con adornos elaborados polas súas veciñas
En Toro engalanan as rúas con adornos elaborados polas súas veciñas
Unha aldea que traballa todo o ano para engalanarse nas festas
A iniciativa dunha pequena aldea en que a cor enche as rúas grazas a implicación e a creatividade dos seus veciños. Nesta aldea de Laza levaban meses traballando dende a distancia para adornala con xeito nas festas patronais, e este é o resultado: máis dun cento de adornos elaborados polas mulleres de Toro, enchen de cor as rúas e lugares máis destacados da aldea. Moitas das artistas residen fóra de aquí durante o ano, pero iso non foi impedimento para que todo estivera a punto para o mes de agosto.
Nesta aldea de Toro residen durante o inverno unhas trinta persoas. No verán son máis de trescentas. Hoxe cóntannos cunha mistura de orgullo e ledicia o seu último proxecto en común, co que conseguiron encher de cor as rúas da aldea.
"Empezamos cuns cadros para facer un Belén para o Nadal e despois xurdiron os mandalas. Pareceume xenial e apunteime dende o primeiro momento e fixen o que puiden".
Moitas das participantes no proxecto residen noutros lugares de Galicia, ou de España, ou mesmo de Europa, así que durante meses houbo que coordinarse a distancia.
"Dá gusto ver a aldea pero grazas a Beni que foi a que empezou. Seguimos atrás dela a facer labor de gancho e cousas que queden bonitas para embelecer a aldea, non?".
E a proposta foi máis ca un éxito: 25 mulleres foron quen de elaborar 120 mandalas que cambiaron a faciana da aldea.
"Gustoulles a todos, agora puxéronas aquí e a xente parécelle a aldea outra. A aldea gústanos porque é nosa, nacemos aquí e estivemos aquí sempre ata que marchamos, que eu tamén vivo en Ourense. E así estivemos todo o inverno traballando con esta faena."
Din que queren poñer en valor o traballo das mulleres, dar a coñecer a súa aldea e mantela viva durante todo o ano.
"A nós sempre nos confunden con Toro de Zamora, que é máis famoso que nós, claro. Pero nós dicimos que queremos reivindicar o Toro de Ourense, que é unha pequena aldea no alto dun monte cunhas vistas preciosas e que no verán estase estupendamente aquí. A ver, todo o ano, que no inverno hai unhas nevadas preciosas", explica Beni Rodríguez, a presidenta da asociación veciñal.
Para cando remate o verán seguirán en contacto porque agora pensan xa no seu próximo proxecto: elaborar novos adornos para a árbore de Nadal da súa aldea.
