Ence descarta que o expediente de Europa a España lle afecte á fábrica de Pontevedra

 O grupo empresarial Ence descartou que o procedemento de infracción aberto pola Comisión Europea contra España sobre a prolongación da concesión de terreos na ría de Pontevedra poida afectarlle á súa fábrica de celulosa.

Nun comunicado, a compañía indica que a legalidade da prórroga para ocupar terreos costeiros na ría de Pontevedra ata 2073 acaba de ser avalada polo Tribunal Supremo.

A sentenza, segundo Ence, non se poderá ver afectada "por modificacións lexislativas que poidan ter lugar con posterioridade", como sería o caso deste proceso que acaba de iniciar Bruxelas contra a xestión da costa española.

Ence subliña que mesmo nun "hipotético escenario futuro" no que, como consecuencia deste procedemento, España tivese que modificar a Lei de Costas, este cambio normativo "non tería en ningún caso carácter retroactivo" e aplicaríase a concesións futuras.

Ademais, a empresa sinala que o Tribunal Constitucional, na súa sentenza do 5 de novembro de 2015, ratificou a constitucionalidade do réxime de prórrogas extraordinarias establecido na actual Lei de Costas.

O alcalde di que Bruxelas reafirma a postura do Concello de Pontevedra

O procedemento aberto pola Comisión Europea contra España pola xestión das concesións en liña de costa "reafirma" a postura do Concello de Pontevedra sobre a fábrica de Ence, segundo o seu alcalde, Miguel Anxo Fernández Lores.

Bruxelas sostén que España non garantiu un proceso de selección "transparente e imparcial" para a adxudicación de concesións relativas ás zonas costeiras e considera que as prórrogas sen xustificación son "contrarias" ás regras da Unión Europea, segundo transcendeu dun procedemento de infracción contra o Estado español da Comisión Europea.

As autoridades europeas poñen o acento, especialmente, naquelas concesións por un período de ata 75 anos -como a concedida a Ence na ría de Pontevedra-, "unha vez máis sen procedemento de selección algún", polo que conclúen que "infrinxe a directiva de servizos".

"Isto vén confirmar e avalar o noso posicionamento", asegurou Fernández Lores.