"Enche a túa mesa de mar": anuncian en Vigo a nova campaña para promocionar o consumo de peixe

O Goberno lanzará este martes a campaña "Enche a a túa mesa de mar" co obxectivo de incentivar o consumo de peixe, cumprindo así unha vella demanda da industria pesqueira.

Así o avanzou o ministro de Agricultura, Pesca e Alimentación, Luis Planas, na clausura do Congreso Conxemar-FAO.

Planas explicou en Vigo que os cidadáns teñen que "valorar o traballo do sector" e sinalou que para iso "é moi importante a pedagoxía", así que lanzarán esa campaña para que o destinatario final "aprecie ese produto tan excelente" que é o peixe de España.

O ministro adiantou que o contido desa campaña darao a coñecer este martes na feira dos produtos do mar conxelados (Conxemar), que se celebra ata o xoves no recinto feiral de Vigo.

Así mesmo advertiu do cambio da sociedade "na forma de traballar, vivir e cociñar" e avogou por que os "produtos pesqueiros estean en condicións de ser máis facilmente consumidos polos cidadáns".

A XII edición do Congreso Internacional Conxemar FAO analizou en Vigo os retos e oportunidades actuais da industria transformadora e comercializadora de produtos do mar e o seu compromiso coa sustentabilidade.

Os expertos analizaron o informe Sofia (acrónimo do Estado mundial da pesca e a acuicultura) de 2024. Por el sóubose que a produción acuícola de animais acuáticos superou por primeira vez a pesca de captura.

Luis Planas considerou que o Congreso Conxemar-FAO é "de referencia mundial para o sector dos produtos pesqueiros" e serve para "discutir o presente e futuro dos temas" que preocupan o sector e as administracións.

Nunha cidade "moderna, emprendedora e aberta", en alusión a Vigo, co "porto máis importante da UE", que -dixo- move 34.000 toneladas de peixe fresco e 626.000 de conxelado, Planas recoñeceu que lle "gusta moito o lema" desta edición, "responsabilidade para o futuro", ao que engadiría algo que vai implícito, "compromiso", que é "o que ten o Goberno de España".

"A nosa primeira responsabilidade é a seguridade alimentaria, que non podemos esquecer", dixo. Planas lamentou que a pobreza e desnutrición aumentaran despois da pandemia e a guerra de Ucraína.

O titular de Pesca reivindicou o "papel que xoga o sector pesqueiro nuns océanos sans e produtivos", pero reclamou tamén que "non hai sustentabilidade se non hai rendibilidade empresarial" e criticou que "algúns teñen un acento excesivo nun dos dous elementos".

Valorou positivamente o ministro que, de acordo co informe Sofia, "o 77% dos desembarques realizados no último ano a nivel mundial fosen de pesqueiras bioloxicamente sostibles" e defendeu seguir loitando contra a pesca ilegal, non declarada e non regulamentada.

Planas puxo o acento no coñecemento científico para determinar os stocks das especies e no progreso da acuicultura, á vez que destacou que esta, sendo "un compoñente fundamental, nunca vai substituír a pesca extractiva". Con todo, a España considerouna unha das líderes de produción de acuicultura dentro da Unión Europea.

Para o ministro, "é moi importante" unha acción coordinada e apostar pola innovación tecnolóxica das frotas para unha pesca responsable.

Tamén deu relevancia ás organizacións de produtores pesqueiros, das que precisou que, cofinanciados con fondos europeos, "son un magnífico instrumento" e poden xogar "un papel de liderado na Política Pesqueira Comunitaria".

Planas agradeceu que a carteira de Pesca vaia en solitario na UE e non con Medio Ambiente e advertiu de que se require "un maior equilibrio nas propostas" de Europa, que non só deben centrarse nos "stocks biolóxicos" senón tamén ter en conta "o impacto económico e social" das medidas que se adoptan.