Entra a roubar nunha farmacia de Vigo e ameaza de morte os empregados cunha nota e unha navalla
Entra a roubar nunha farmacia de Vigo e ameaza de morte os empregados cunha nota e unha navalla
O farmacéutico agarroulle a man e comezou un forcexo ata que o atracador fuxiu ao non poder facerse cos cartos da caixa rexistradora
Finalmente foi localizado e detido pola policía tras revisar as gravacións de seguridade
Imaxe de arquivo dunha farmacia allea aos feitos / Europa Press
Un home de 41 anos foi detido pola Policía Local de Vigo despois de que accedera a unha farmacia e ameazara de morte por escrito e cunha navalla na man aos dependentes.
Os feitos, segundo informou este luns a Policía Local, tiveron lugar arredor das dez da mañá do sábado na Avenida da Florida, cando o atracador accedeu a unha farmacia cunha navalla na man e deixou sobre o mostrador unha nota na que advertía aos dependentes que aquilo era un atraco e que se activaban o sistema de alarma ou daban aviso á policía mataría a todos os alí presentes.
Segundo a Policía, ante a inactividade do responsable da farmacia, o atracador comezou a poñerse nervioso e a golpear o mostrador co puño.
Nese momento, o farmacéutico agarroulle a man e comezou un forcexo entre ambos, tentando o atracador facerse coa caixa rexistradora, o cal non conseguiu, polo que abandonou o local á carreira perseguido polo traballador, quen o perdeu de vista nun canellón próximo.
Cos trazos físicos do atracador e tras o visionado das gravacións das cámaras de vixilancia, a Policía emprendeu a procura do atracador, quen foi localizado na Avenida Castelao e detido a pesar da resistencia que opuxo.
