Entra en vigor este sábado a lei que persegue as recensións falsas na venda en liña

Mañá sábado entra en vigor a norma que atallará as recensións e opinións falsas nas vendas en liña e que obrigará ás empresas, entre outras cousas, a indicar e garantir que as recensións que acompañan os seus bens e servizos son de persoas que realmente os usaron ou adquiriron.

En concreto, trátase do real decreto aprobado o pasado mes de novembro, que modifica a Lei Xeral para Defensa dos Consumidores e a Lei de Competencia Desleal para ampliar os dereitos dos usuarios no comercio electrónico.

A partir deste sábado, o Ministerio de Consumo terá facultade para sancionar as empresas por fraudes masivas e a publicidade encuberta a través das redes sociais. Perseguirase:

• A publicación de recensións e valoracións falsas ou pagadas polo fabricante nos produtos á venda na Internet. Considerarase práctica desleal incluír recensións procedentes de consumidores sen comprobar que adquiriron realmente o ben.

• A revenda de entradas a espectáculos mediante bots (robot dixitais), cando impidan que todos os consumidores poidan acceder ao mercado con normalidade.

• Comerciar un ben como idéntico cando os produtos sexan diferentes, co fin de evitar así que determinadas marcas varíen a calidade dun mesmo produto dependendo do país da UE no que se comercialicen. Considerarase tamén desleal.

• O incumprimento dalgunhas garantías para os consumidores e tamén de limitacións e esixencias inxustificadas, como obstaculizar o dereito a baixa contractual ou dun servizo.

Infraccións e multas

As sancións máximas subirán ata un millón de euros ou oito veces o beneficio que se obtivo ilicitamente, no caso de infraccións cometidas unicamente en España, e ata o 4 % do volume de facturación das compañías, cando estas infraccións se produzan en varios Estados membros.

Cuantificarase a multa en función da capacidade económica do responsable, o grao de culpabilidade ou a existencia de intencionalidade, ademais do carácter continuado da infracción, o número de consumidores afectados ou o nivel dos danos e prexuízos que sufrisen.

Ademais da multa, poderanse aplicar outras sancións como o comiso das mercadorías, o peche dos establecementos por un prazo de ata cinco anos e a publicidade das sancións impostas.

Estarán suxeitas ao novo réxime sancionador a introdución ou mantemento de cláusulas abusivas nos contratos, a  obstaculización do dereito para poñer fin a un contrato ou causar baixa nun servizo, os incumprimentos na etiquetaxe ou a facturación de produtos e servizos non contratados.

De aprobarse antes esta normativa, segundo dixo o ministro Alberto Garzón cando foi aprobado o real decreto, permitiuse actuar con celeridade ante casos como o 'dieselgate' ou as cláusulas solo das hipotecas que afectaron millóns de españois.