Entran en vigor os permisos para o coidado de familiares
Entran en vigor os permisos para o coidado de familiares
Tamén haberá un permiso remunerado de quince días en caso de rexistro de parella de feito
![](https://img-g24-crtvg.flumotion.com/prog24/2023/20230630/familia.png)
Os novos permisos para facilitar a conciliación e o coidado de familiares ou conviventes entran en vigor este venres, xunto ao permiso remunerado de quince días en caso de rexistro de parella de feito, como existe para os matrimonios.
Estas medidas foron incluídas polo Goberno no decreto anticrise aprobado polo Consello de Ministros o pasado martes.
Os permisos de conciliación estaban previstos na lei de familias que deseñou o Ministerio de Dereitos Sociais e Axenda 2030 e que non puido tramitarse pola convocatoria electoral.
Segundo apunta o Goberno no decreto publicado no Boletín Oficial do Estado (BOE) deste xoves, eran unha esixencia dunha directiva europea que se debía traspoñer antes de agosto do ano pasado.
Catro días por motivos familiares urxentes
O primeiro dos permisos retribuídos dá dereito a ausentarse do traballo ata catro días ao ano por causa de forza maior cando sexa necesario por motivos urxentes relacionados con familiares ou persoas conviventes, en caso de enfermidade ou accidente que fagan indispensable a súa presenza inmediata.
Cinco días por accidente ou enfermidade grave
Haberá ademais cinco días de permiso retribuído por accidente ou enfermidade graves, hospitalización ou intervención cirúrxica sen hospitalización que precise repouso domiciliario da parella, de parentes de ata o segundo grao por consanguineidad ou afinidade ou de conviventes que necesiten coidados.
Oito semanas ata que o menor cumpra 8 anos
A terceira medida é un permiso parental de oito semanas que poderá gozarse de forma continua ou descontinua, a tempo completo ou parcial, ata que o menor cumpra 8 anos. Poderá usarse, por exemplo, nos meses de verán ou durante os procesos de adaptación nas escolas infantís en setembro.
Coas novas normas, o trato desfavorable dispensado a mulleres ou homes polo exercicio dos seus dereitos de conciliación ou corresponsabilidade será constitutivo de discriminación por razón de sexo.