Escala histórica de tres cruceiros no porto de Vigo
Escala histórica de tres cruceiros no porto de Vigo
Había tres anos que non se repetía un atraque simultáneo tan multitudinario
O peirao de Vigo viviu unha xornada multitudinaria. Alí puidemos ver hoxe unha estampa que había tres anos que non se repetía: a de tres transatlánticos facendo escala de xeito simultáneo nestas instalacións portuarias.
As esloras do Ventura e do Celebrity Silhouette, que suman máis de 600 metros, ocuparon practicamente todo o peirao de transatlánticos vigués.
Foi a derradeira parada antes de volveren á casa ambos os buques, que chegaron xuntos de Lisboa e marcharon ao mesmo tempo cara a Southampton.
Así que en Galicia despediron as vacacións os seus pasaxeiros. Os que escolleron quedar a pasar o día en Vigo gozaron da comida e da beleza dun día solleiro.
Houbo quen chegou ao cumio do Castro para gozar das vistas, xa gardadas no carrete da memoria.
O terceiro visitante da xornada, o Viking Mars, permaneceu atracado no peirao do Comercio. Visitaba Vigo por primeira vez dentro da súa viaxe inaugural. A media tarde puxo rumbo cara a Málaga para continuar travesía.
Había tres anos que este peirao non acollía unha triple escala de cruceiros. A bordo destes tres transatlánticos viaxan uns 9.000 pasaxeiros, algúns de nacionalidade estadounidense e os máis deles británicos.
Ademais desta, a máis multitudinaria do ano, para este mes e para o vindeiro, hai previstas dúas escalas duplas.
Segundo o porto de Vigo, os arredor de 90 atraques cos que se pechará 2022 son cifras que significan unha transición á volta á normalidade do tráfico de cruceiros.
