Chega ao porto de San Cibrao o novo depósito de bauxita para a planta de alumina

A planta de alumina de Alcoa recibiu este venres un novo depósito que vai axilizar a descarga de bauxita no porto de San Cibrao.

O depósito foi fabricado por Herjimar nas súas instalacións de Cartaxena, e supuxo un investimento por parte de Alcoa de 5,5 millóns de euros.

Esta instalación achega eficiencias no proceso de descarga dos buques e no transporte desde o peirao de carga ata o departamento de Dixestión, no que se inicia o proceso industrial de produción da alumina.

Coas súas 200 toneladas e 25 metros de alto, trátase do depósito ecolóxico máis grande de España.

Este depósito vai permitir que os dous guindastres sexan capaces de descargar na mesma cinta transportadora, logrando un ritmo máis continuo no desembarco do mineral. Desta forma, a bauxita irá directamente ao seu lugar de almacenamento sen requirir localizacións temporais, facendo que o proceso sexa máis eficiente. Ao mesmo tempo, permitirá que a bauxita estea encerrada no sistema de cinta transportadora, de maneira que non se xerarán emisións de po polo vento.

A posta en marcha do novo sistema de descarga completo está prevista para outubro.

As operacións de atraque do buque tiveron lugar na noite deste venres e as de descarga, durante o sábado.