Eva Dios, deportivista ata 2029: "Tiven a oportunidade de medrar nun sitio idílico"
Eva Dios suma 125 encontros oficiais coa camiseta branquiazul, que a converten na segunda xogadora con máis partidos na historia do Dépor ABANCA
Eva Dios prolongou a súa vinculación co Deportivo ABANCA ata xuño de 2029.
A futbolista arousá incorporouse ao Deportivo ABANCA B no verán de 2020 procedente das Viaxes Interrías FF, despois de comezar a súa traxectoria no Céltiga CF para, posteriormente, xogar no Portonovo SD e o Victoria FC de Santiago.
Con todo, pouco tardou en dar o salto ao primeiro equipo para xa non abandonalo. Desde o seu debut, o 31 de outubro de 2020 fronte o Santa Teresa CD en Abegondo, Eva Dios xa suma 125 encontros oficiais coa camiseta branquiazul, que a converten na segunda xogadora con máis partidos na historia do Dépor ABANCA, só superada por Cris Martínez (202).
"Tiven a oportunidade de medrar nun sitio idílico, quero responder con confianza"
Eva Dios disputou 41 partidos en Primera Iberdrola, 71 en Primera Federación/Reto Iberdrola, 4 en play-off de ascenso a Liga F, 1 en play-out de permanencia en Primera Federación e 4 en Copa da Raíña.
