Evacuadas 400 persoas dun tren que cortou a liña do AVE Barcelona-Madrid
O convoi quedou parado ás 6:40 horas no túnel de saída da estación de Sants por unha avaría na catenaria
A circulación quedou restablecida en ambos os dous sentidos ás 9:30 horas tras a recuperación da tensión nas vías
Outra avaría eléctrica provocou atrasos en Barcelona este venres
Un total de 403 persoas foron evacuadas dun tren parado no túnel de saída da estación de Sants de Barcelona, o que provocou o corte da liña de alta velocidade que conecta a capital catalá con Madrid durante varias horas.
Segundo fontes de Protección Civil, o tren de alta velocidade de Ouigo quedou bloqueado ás 6:40 horas da mañá deste sábado no túnel de saída da estación por unha avaría na catenaria. Dada a proximidade da estación, a evacuación foi a pé.
Pouco despois das 9:00 horas quedou restablecida parcialmente a circulación de trens de alta velocidade, longa e media distancia en Barcelona, onde funcionaba unha soa vía para a entrada e saída.
Media hora máis tarde, recuperouse a tensión e puideron retirar o convoi que interrompía o tránsito. Os trens acumularon atrasos de entre unha e dúas horas de media. Dende entón, restableceuse a circulación por completo.
Plan de emerxencia
Por mor deste novo incidente ferroviario, Protección Civil activou a alerta do plan de emerxencia FERROCAT.
Este corte na vía de alta velocidade rexistrouse vinte e catro horas despois de que outra avaría eléctrica obrigara este venres a desaloxar 900 persoas dun tren de proximidade en L'Hospitalet de Llobregat.
.png)
