Evacúan unha casa en Tomiño por causa dun incendio no garaxe da vivenda

Un incendio ocorrido de madrugada no garaxe dunha vivenda unifamiliar no lugar de Gabín, en Tomiño, obrigou a desaloxar o inmoble. Os servizos de extinción tiveron que empregarse a fondo para apagar o lume e tardaron tres horas en conseguir controlar a situación.

Foron os propietarios os que avisaron aos bombeiros. Cando chegaron tiveron que entrar polo interior da vivenda e forzar a porta que dá lugar ao garaxe.

"A porta do garaxe estaba pechada, entón houbo que ingresar desde o interior da vivenda. A cantidade de fume e de lapas fixo que o resto da vivenda se vise afectada polo fume. Incluso polas altas temperaturas, posto que a sectorización non funcionou correctamente. Unha vez que puidemos forzar a porta do garaxe ao entrar pola porta principal, xa puidemos facer un ataque contra o lume un pouco mellor. Foi un labor laborioso e levounos tempo pero conseguimos que non se expandise ao resto da vivenda, que era o que máis nos preocupaba", explica Roberto Domínguez, bombeiro do Consorcio Provincial de Pontevedra.

Así, grazas á rápida intervención dos servizos de emerxencia, o lume non se propagou á vivenda, aínda que si que afectou a diversas pertenzas. No interior do garaxe había electrodomésticos e diversos trebellos, pero por sorte non había ningún vehículo. 

"Arderon varios aveños que había no interior do garaxe, entre outras cousas, electrodomésticos, e tamén cousas que almacenaban os propietarios no propio garaxe", relatan os bombeiros.

Polo momento descoñécese que puido provocar o incendio. Afortunadamente non houbo danos persoais.