Facenda baixará as retencións do IRPF a uns 250.000 contribuíntes
Facenda baixará as retencións do IRPF a uns 250.000 contribuíntes
Aplicarase a rendas do traballo inferiores a 35.200 euros que cumpran unha serie de requisitos persoais e familiares
A medida non implica unha rebaixa das cantidades a pagar, trátase dun axuste das retencións
O Ministerio de Facenda prevé modificar o regulamento do IRPF para rebaixar a partir de 2023 as retencións que se practican a uns 250.000 contribuíntes con rendas do traballo inferiores a 35.200 euros que cumpran unha serie de características persoais e familiares.
Este cambio afecta un colectivo moi concreto e non implica unha rebaixa das cantidades a pagar, trátase dun axuste das retencións, segundo se desprende do borrador do proxecto de lei de modificación do regulamento que Facenda abriu a información pública.
Expertos fiscais explican que a medida terá un impacto moi limitado xa que boa parte das declaracións da renda destes contribuíntes saen a devolver. O principal efecto do cambio normativo será contar con maior liquidez durante o ano e menos devolucións ao presentar a liquidación do exercicio seguinte.
Pero tamén poderían darse situacións en que as retencións se reduzan en exceso e os contribuíntes teñan que aboar a Facenda a diferenza na declaración da renda que se presentaría na primavera de 2024, dando lugar a un desprazamento no tempo da carga tributaria.
De todos os xeitos, o contribuínte que así o desexe pode solicitar que lle apliquen as retencións que considere máis axeitadas, xa que terá que liquidar a diferenza despois.
