Falece Sito Sedes, excantante de Los Satélites, aos 78 anos de idade
Falece Sito Sedes, excantante de Los Satélites, aos 78 anos de idade
Sedes foi tamén produtor na Televisión de Galicia
![](https://img-g24-crtvg.flumotion.com/prog24/2024/20240724/sito_sedes.jpg)
O cantante Sito Sedes (Narón -A Coruña-, 1946), líder da histórica orquestra galega Os Satélites, faleceu este mércores aos 78 anos de idade, segundo confirmaron fontes da súa contorna.
O vocalista, que iniciou a súa carreira en agrupacións como Orquestra Radio ou Sintonía, fíxose popular nos Satélites, coa que seguiu colaborando en citas destacadas nos últimos anos tras ser a súa voz principal durante máis dunha década.
Nado no barrio naronés de Piñeiros, estivo vinculado desde a súa infancia ao veciño municipio de Fene, onde se lle rendeu homenaxe pola súa traxectoria.
O seu pai foi compoñente do ferrolán Real Coro Toxos e Froles, decano dos coros de Galicia.
Sito tamén foi parte de Garufa Blue Devils Big Band e compartiu protagonismo na escena musical galega con outra das súas grandes voces, a de Pucho Boedo, falecido en 1986 e líder do desaparecido grupo Os Tamara, no que tamén estivo Sedes.